Чақалоқнинг одатдагидан кам ухлашига нима сабаб бўлиши мумкин?

Чақалоқларнинг одатдагидан кам ухлашига нима сабаб бўлиши мумкин? Неонатолог Малика Усмонованинг сўзларига кўра, меъёридан кам уйқу асосан марказий асаб тизимининг перинатал зарарланиши бўлган чақалоқларда кузатилади.

Мисол учун, ҳомиладорликнинг сўнгги даврида ёки туғуруқ вақтида онанинг соғлиғи билан боғлиқ муаммолар юзага келса, яъни бола асфиксия (нафас олиш фаолиятининг ўткир бузилиши туфайли қонда ва тўқималарда кислород етишмаслиги), гипоксия (қонда ва тўқималарда кислороднинг меъёрдан камайиши) ёки инфексия юқтирган ҳолда туғилса, туғуруқхонадан чиққандан сўнг унда уйқу бузилиши ҳолати учрайди.

Одатда, янги туғилган чақалоқ бир суткада 18 соатгача ухлайди. Агар у 14-16 соат дам олаётган бўлса, бу ҳам меъёр ҳисобланади. Бироқ 14 соатдан кам уйқу бузилиши ҳисобланади.

Шунингдек, 5-9 ойлик болалар ўртача 15-16 соат, 10 ойликдан 2 ёшгача бўлган чақалоқлар 12-13 соат ухлайди. Вақт ўтган сари эса кундузгига нисбатан тунда кўпроқ ором олади.

Шуни билиш керакки, уйқу вақтида гўдакнинг қонига соматотропин гормонининг 90 фоизи ажралиб чиқади. Бу гормон чақалоқнинг жисмоний ривожланишини таъминлайди.