Centrum Air Самара — Тошкент рейсига йўловчининг қўйилмаганига изоҳ берди
Centrum Air Самара — Тошкент рейсига қўйилмаган блогер komil_vlogs’нинг хабарига изоҳ берди. У борткузатувчидан фақат ўзбек тилида гапиришни илтимос қилганини даъво қилган. Компания эса эркак ўзини агрессив тутганини маълум қилди. Инстаграмдаги видеосида у борткузатувчилар ҳақида ҳақоратли фикрлар билдирган.
Centrum Air Самара — Тошкент рейсига йўловчи нима сабабдан қўйилмаганига изоҳ берди
Centrum Air авиакомпанияси 5 октябрь куни C6468 Самара — Тошкент рейси билан учган блогер komil_vlogs’нинг борткузатувчидан у билан ўзбек тилида гаплашишни сўраганидан кейин бортга қўйилмагани ҳақидаги хабарига муносабат билдирди.
«Centrum Air — кўп миллатли Ўзбекистонда ташкил этилган ва ривожланаётган авиакомпания. Барча борткузатувчиларимиз ўзбек, рус ва инглиз тилларини билишади ва йўловчилар билан улар учун қулай тилда мулоқот қилишади», — деб хабар берди ташувчи матбуот хизмати.
Авиакомпаниянинг билдиришича, йўловчи «борткузатувчига нисбатан ўзини тажовузкор тутган: қўпол шаклда талаблар қўйган, ходимни ҳақорат қилган ва йўловчиларни бортга чиқариш вақтида унинг ишига тўсқинлик қилган».
«Бундай хатти-ҳаракатлар бортдаги хавфсизлик ва тартибга таҳдид солиши мумкин эди, шу сабабли ҳаво кемаси командири йўловчини парвозга қўймаслик ҳақида қарор қабул қилди. Биз бу қарорни тўлиқ асосли деб ҳисоблаймиз», — дея маълум қилди Centrum Air.
«Ҳодисанинг барча тафсилотлари ҳужжатлаштирилган. Авиакомпания ушбу фуқаронинг хатти-ҳаракатлари юзасидан ҳуқуқни муҳофаза қилиш органларига мурожаат қилиш имкониятини кўриб чиқмоқда», — дея қўшимча қилди компания.