Cengiz Holding йил охиригача Ўзбекистонда яна бир электр станциясини ишга туширишни режалаштирмоқда
Туркиянинг Cengiz Holding компанияси 2026 йил охиригача Жиззах вилоятида қуввати 550 МВт бўлган буғ-газ электр станциясини ишга туширишни режалаштирмоқда. Аввалроқ уни фойдаланишга топшириш 2025 йилга мўлжалланган эди. Холдинг раҳбари Меҳмет Ченгизнинг сўзларига кўра, компания Ўзбекистонда янги лойиҳаларни амалга ошириш имкониятини ҳам кўриб чиқмоқда.
Cengiz Holding йил охиригача Ўзбекистонда яна бир электр станциясини ишга туширишни режалаштирмоқда
Туркиянинг Cengiz Holding компанияси 2026 йил охиригача Ўзбекистоннинг Жиззах вилоятида 550 МВт қувватга эга буғ-газ электр станциясини фойдаланишга топширишни режалаштирмоқда. Бу ҳақда холдинг бошқаруви раиси Меҳмет Ченгиз 16 октябрь куни президент Шавкат Мирзиёев билан учрашувда маълум қилди.
Тадбиркорнинг сўзларига кўра, Cengiz Holding Ўзбекистонда қиймати тахминан 800 млн долларга баҳоланаётган учинчи энергетика лойиҳасини амалга оширмоқда. Унинг таъкидлашича, холдингнинг мамлакатга киритган жами инвестициялари ҳажми 900 млн доллардан ошди.
«Тошкент ва Сирдарё вилоятларидаги лойиҳалар амалга оширилгач, йил охиригача Жиззахда электр станциясини ишга туширишни режалаштирмоқдамиз. Натижада биз томонимиздан қурилган объектларнинг умумий ўрнатилган қуввати 1010 МВтга етади», — деди Меҳмет Ченгиз ёқилғи-энергетика соҳаси инвесторлари билан ўтказилган очиқ мулоқотда.
, холдингнинг Ўзбекистондаги энергетика лойиҳаларини тақдим этувчи манбада 480 МВт амалдаги қувватлар ва Жиззахни ҳисобга олган ҳолда 1030 МВт кўрсатилган.
У шунингдек, компания Ўзбекистонда тўртинчи инвестиция лойиҳасини амалга ошириш имкониятини кўриб чиқаётганини маълум қилди.
Ченгизнинг сўзларига кўра, Cengiz Holding умумий ўрнатилган қуввати қарийб 6000 МВт бўлган энергетика қувватларига, шунингдек, мис, кобальт ва алюминий ишлаб чиқариш корхоналарига эга.
Холдинг Туркиядан ташқарида, жумладан Ўзбекистон, Қирғизистон, Озарбайжон, Сурия, Руминия ва Буюк Британияда ўз фаолиятини олиб бормоқда. Компания шунингдек, Европа мамлакатларида инфратузилма лойиҳаларини амалга оширишда иштирок этмоқда.
Тадбиркор Cengiz Holding нафақат энергетикага, балки Ўзбекистон иқтисодиётининг бошқа тармоқларига ҳам инвестицияларни кенгайтириш имкониятларини кўриб чиқаётганини таъкидлади.
Хусусан, у энергетика лойиҳалари учун инфратузилмани, жумладан газ таъминоти, электр узатиш тармоқлари ва тақсимлаш тармоқларини ривожлантириш зарурлигига эътибор қаратди.
Жавоб тариқасида президент Шавкат Мирзиёев холдинг раҳбарига компаниянинг инфратузилма ва қурилиш соҳаларидаги тажрибасини ҳисобга олган ҳолда Янги Тошкент қурилишида иштирок этиш бўйича таклифлар киритишни таклиф қилди.
Кейинчалик, давлат раҳбари билан алоҳида учрашув якунларини шарҳлар экан, Меҳмет Ченгиз Ўзбекистондаги фаолиятини янада кенгайтиришдан манфаатдор эканини тасдиқлади. «Биз бу ерда тўртинчи, эҳтимол бешинчи лойиҳани ҳам амалга ошириш ниятидамиз», — деди у.
Президент матбуот хизмати маълумотларига кўра, музокаралар давомида янги иссиқлик электр станцияларини қуриш, тақсимловчи электр тармоқларини модернизация қилиш ва геология соҳасидаги ҳамкорликни кенгайтириш истиқболлари ҳам муҳокама қилинган.
Cengiz Holding иштирокида Ўзбекистонда илгари иккита иссиқлик электр станцияси — Тошкент ва Сирдарё вилоятларида фойдаланишга топширилган эди. Илгари эълон қилинган расмий маълумотларга кўра, уларнинг умумий ўрнатилган қуввати 460 МВт ни ташкил этади.
2023 йил ноябрь ойида президент Жиззах вилоятининг Шароф Рашидов туманида 550 МВт қувватга эга буғ-газ электр станциясини қуриш тўғрисидаги қарорни имзолаган эди.
Ўшанда лойиҳа қиймати 500 млн долларга баҳоланган, объектни фойдаланишга топшириш эса 2025 йилга режалаштирилган эди. Электр станцияси йилига 4 млрд кВт·соатдан ортиқ электр энергияси ишлаб чиқариши ва камида 700 млн куб метр табиий газни тежашга имкон бериши кутилган эди.
Қарорда шунингдек, «Ўзбекистон миллий электр тармоқлари» компанияси томонидан 25 йил давомида электр энергиясини харид қилиш назарда тутилган. Станцияни табиий газ ва техник сув билан таъминлаш мажбуриятлари тегишли давлат ташкилотлари зиммасига юкланган.