Бухорода 4 йил давомида қурол яшириб келган аёлга ҳукм ўқилди
Ашёвий далил сифатида сақланган «Иж-5» русумли ов милтиғини давлат эгалигига ўтказиш тўғрисида қарор қабул қилинган.
Бухорода тўрт йил давомида ов милтиғини яшириб келган аёлга нисбатан суд ҳукми ўқилди.
Воқеа 2022-йилда бошланган. Ота-онаси даволаниш учун Тошкентга кетган пайтда, фуқаро Ш.А. бобосидан қолган эски уйни буздирган. Ер текисланаётганда, тупроқ орасидан бир қоп топилган. Қоп ичида икки бўлак темирга ўхшаш буюмлар бўлиб, кейинчалик улар "Ижевск" қурол заводида ишлаб чиқарилган, 20 калибрли "Иж-5" русумли ов милтиғи эканлиги аниқланган.
Ш.А. ўша заҳотиёқ, яшаш хонадонида ҳар қандай қурол борлиги ҳақида тегишли идораларга хабар бериши кераклигини билса-да, атайин бу ҳақда маълумот бермаган. У милтиқни ўз уйига олиб кетиб, аввал сомонхонага, кейин эса бошқа жойга яшириб қўйган. Қурол қарийб тўрт йил давомида рухсатномасиз сақланган.
2025-йилнинг кузида яқин таниши унга бу қуролни расмийлаштириш ёки топшириш зарурлигини айтган. Бироқ, аёл бу ишни пайсалга солиб келган. Жорий йилда ҳуқуқни муҳофаза қилувчи орган ходимларининг ушбу масала бўйича унинг хонадонига келиши аёлнинг шунча вақт давомида қурол борлиги ҳақида ҳатто ўз оила аъзоларини ҳам огоҳлантирмаганини ошкор қилган. У қурол борлигини яширмаган ва ов милтиғини ўзи яшириб қўйган жойидан – ҳашаклар орасидан олиб чиқиб, ихтиёрий равишда топширишга мажбур бўлган.
Тергов давомида тайинланган баллистик экспертиза хулосаси милтиқнинг ҳақиқатан ҳам ўқотар қурол эканлигини ва ундан ўқ узиш мумкинлигини тасдиқлаган. Судда сўроқ қилинган икки нафар холис ҳам қуролнинг айнан Ш.А. томонидан тақдим этилганини тасдиқлаб, кўрсатма берган.
Судланувчи айбига тўлиқ иқрор бўлган. У қуролни сотмаганини, ундан фойдаланмаганини ва қилган ишидан чин дилдан пушаймон эканлигини билдирган. Илгари судланмагани, айбига иқрорлиги ва оилавий шароити суд томонидан жазони енгиллаштирувчи ҳолат сифатида баҳоланган.
"Қонун олдида қуролдан фойдаланилгани ёки йўқлиги эмас, уни қонунга хилоф равишда сақлашнинг ўзи ҳам жиноят ҳисобланади. Топилган ўқотар қуролни тегишли идораларга топширмаслик жиноий жавобгарликка сабаб бўлади", — дейди Бобораҳим Очилов.
Суд Ш.A.ni Ўзбекистон Республикаси Жиноят кодексининг тегишли моддаларида назарда тутилган жиноятни содир этганликда айбли деб топди. Унга икки йил муддатга озодликни чеклаш жазоси тайинланди.
Маълумот ўрнида: Ашёвий далил сифатида сақланган "Иж-5" русумли ов милтиғини давлат эгалигига ўтказиш тўғрисида қарор қабул қилинган.