“Бу ерда ўлишнинг кераги йўқ”: Таиланд бош вазири хорижликларга мурожаат қилди
“Бу ерда ўлишнинг кераги йўқ”: Таиланд бош вазири хорижликларга мурожаат қилди
Таиланд бош вазири ва ички ишлар вазири Анутхин Чанвиракун мамлакатда узоқ вақт яшаб келаётган хорижликларга вафот этиш учун ўз юртига қайтишни тавсия қилди.
“Яқинда мен (чет элликлардан – таҳр.) ҳатто хусусий қабристон ташкил этиш бўйича сўров келиб тушганидан хабар топдим. Бу ҳолат ошиб тушди, чегаралардан чиқиб кетмоқда. Сиз бу ерга (Таиландга) келишингизга рухсат берганимиз учун миннатдор бўлишингиз керак. Тирикчилик учун ҳалол меҳнат қилишга келгансиз. Агар ўладиган бўлсангиз, ўз ватанингизга бориб ўлинг. Бу ерда ўлишнинг кераги йўқ. Бизни эксплуатация қилишга уринманг”, деди Чанвиракун Таиланд провинсиялари губернаторлари билан ўтказилган йиғилишда.
У, шунингдек, чет эл фуқаролари ҳукумат рухсатисиз ўз хоҳишига кўра Таиландда диний муассаса ва жамоалар ташкил этмаслиги кераклигини таъкидлади. Айниқса, “ресторан очиш учун лицензия олиб, унинг ўрнига ибодатхона ташкил этиш” ҳолатларига йўл қўйилмаслигини билдирди.
Чанвиракун провинсия раҳбарларини ўз ҳудудида чет эл фуқароларининг ноқонуний фаолиятига, шунингдек, чет элликларнинг Таиланд анъаналари ва халқига нисбатан ҳурмацизлик ҳолатларига қатъий чек қўйишга чақирди. Бундай ҳолларда хорижликка нисбатан тезлаштирилган депортация ишга тушади.
“Таиланд хорижликларни қабул қилишга тайёр, аммо ҳамкорлик ўзаро манфаатли бўлиши керак. Туризм мамлакатга маблағ ва инвестициялар олиб келади, аммо бу ҳеч кимга бошқаларни эксплуатация қилиш ёки инвестициялардан ноқонуний фаолият учун фойдаланиш ҳуқуқини бермайди”, деди бош вазир.
У бундай фаолиятга Таиланд фуқароларидан бизнесни ташкил этишда сохта шахслар сифатида фойдаланиш ҳам киришини тушунтирди. Чанвиракун гап Осиё, Яқин Шарқ, Марказий Осиё, Европа ва Африка давлатларидан келганлар ҳақида бораётганини айтди.
Таиланд аҳолисининг аксарияти буддизмга эътиқод қилади. Буддист анъаналарида марҳумларни кремация қилиш кенг тарқалгани сабабли, мамлакатда дафн маросимлари учун қабристонлардан фойдаланиш нисбатан кам учрайди.
Маълумот ўрнида, 15-сентябрдан бошлаб Ўзбекистон фуқаролари Таиландга бориши учун электрон виза олиши керак бўлади. Қироллик 93 та давлат учун ягона 60 кунлик визасиз режим ўрнига бир нечта алоҳида тоифани жорий этган. Аммо Ўзбекистон улар қаторига киритилмаган, шу сабаб фуқаролардан саёҳат олди виза олиш талаб этилади. Ўзбекистон фуқароларининг э-виса аризаларини Таиланднинг Москвадаги элчихонаси кўриб чиқади. Виза тўлови 40 доллар бўлиб, аризани сафардан тахминан 1 ой олдин бериш тавсия этилади.