«Бу режалаштирилган операция». Зеленский Украина учун интернет атайлаб секинлаштирилганини айтмоқда
АҚШ эса буни рад этмоқда. Нималар маълум?
«Бу режалаштирилган операция». Зеленский Украина учун интернет атайлаб секинлаштирилганини айтмоқда
АҚШ давлат котиби Марко Рубио Оқ уй Спасе Х компаниясининг сунъий йўлдош интернетини Украина ҳарбийлари учун чеклаш ҳақида фармойиш бермаганини билдирди. Унинг бу гаплари Украина президенти Володимир Зеленскийнинг интернет-терминаллар ҳали ҳам юқори тезликда ҳаракатланадиган қурилмаларда ишлай олмаслиги ҳақидаги даъволарига зид келади.
Сўнгги бир ҳафта ичида Украина расмийлари ва ҳарбийлари Украина қуролли кучлари дронларга ўрнатилган сунъий йўлдош интернет терминалларидан фойдаланиш имкониятини йўқотганини айтиб келмоқда.
Украинадаги Спасе Х хизматлари билан боғлиқ муаммолар ўтган ҳафта охирида, Киев ва Вашингтон ўртасидаги муносабатлар кескин совиган пайтда маълум бўлганди. Ўшанда президент Доналд Трамп Зеленскийни Россиядаги нефтни қайта ишлаш заводларига зарба бергани учун танқид қилган ва Владимир Путин билан жаҳон бозорига бир неча партия дизел ёқилғиси етказиб бериш борасида келишувга эришганди.
Орадан бироз вақт ўтгач, украин ҳарбийлари журналистларга қурилмаларнинг тезлиги бўйича чекловлар аста-секин йўқола бошлаганини, бироқ хизмат ҳали тўлиқ тикланмаганини айтишди.
Шанба куни эса Зеленский журналистлар саволларига жавоб берар экан, ҳозир Старлинк терминаллари ишлашда давом этаётган максимал тезлик соатига 161 километрни ташкил этишини айтди. «Мен кўрган ва эшитган ҳисоботларга кўра, шундан сўнг Старлинк бутунлай ўчиб қолади ва биз дронни йўқотамиз», – деди Зеленский.
У бундай чекловлар сабаб Украина ҳарбийлари позициялардаги жангчиларга озиқ-овқат ва сув етказиб бериш имкониятидан маҳрум бўлганини ҳам қўшимча қилди. «Бу ҳарбийлар ёки техника ўта олмайдиган жойларда, душман дронлари назорати туфайли изоляция юзага келган ҳудудларда жуда муҳим», – деди Зеленский.
Ҳафта давомида АҚШ расмийлари Украина ҳарбийлари учун сунъий йўлдош интернети чеклангани ҳақидаги хабарларни бир неча бор рад этди.
«Бу ким бўлиши мумкинлигини умуман билмайман, чунки бу мен эмас эдим ва Илон бўлган деб ҳам ўйламайман. Тушунишимча, ҳаммаси аввалгидек», – деди Трамп 16-октабр куни журналистларнинг чекловлар сабаблари ҳақидаги саволига жавобан.
Зеленскийнинг сунъий йўлдош интернети билан жиҳозланган қурилмаларнинг максимал тезлиги пасайтирилгани ҳақидаги баёнотларига АҚШ давлат котиби ҳам муносабат билдирди.