Бруклиндаги бинода юз берган ёнғинда олти киши ҳалок бўлди ва бошқалар жароҳат олди
Олов юзага келиши сабаби ҳозирча аниқ эмас, воқеа жойига 230 нафар ёнғин ўчириш ва шошилинч тиббий ёрдам ходимлари етиб борган.
Нью-Йорк шаҳрининг Бруклин туманидаги турар жой биносида йирик ёнғин чиқиши оқибатида олти киши ҳалок бўлди, деб хабар берди расмийлар.
Нью-Йорк шаҳри ёнғин хавфсизлиги хизмати (FDNY) АҚШ ОАВларига маълум қилишича, пайшанба куни эрталаб содир бўлган ёнғинда яна етти киши жароҳат олган.
BBC’нинг АҚШдаги ҳамкори CBS News кўриб чиққан баёнотда FDNY маҳаллий вақт билан соат 01:40 ларда (Гринвич бўйича 06:40) Сансет-Парк яқинидаги воқеа жойига 230 дан ортиқ ёнғин ўчирувчи ва шошилинч тиббий ёрдам ходимлари юборилганини маълум қилди.
Ёнғин сабаблари ҳозирча номаълум.
Ҳодиса жойида литий-ионли батарея бўлгани сабабли хавфли моддалар бўйича мутахассислар гуруҳи ҳам юборилган, бироқ унинг ёнғинга алоқадорлиги ёки йўқлиги ҳозирча аниқ эмас.
Хабар қилинишича, қутқарувчилар етиб келганда аланга бинонинг биринчи ва иккинчи қаватларига тарқалиб бўлган.
Ҳалок бўлганларнинг тўрттасининг жасади бино ичидан топилган. Яна икки киши оғир аҳволда топилиб, кейинчалик вафот этган. АҚШ ОАВ хабарларида улар шифохонада ёки у ерга олиб кетилаётганда вафот этгани ҳақида турли маълумотлар берилган.
Омон қолган етти кишининг жароҳатлари енгилдан оғиргача экани айтилмоқда.