Британиялик рэпер Yung Filly келаси йилнинг июнь ойида Австралияда зўрлаш бўйича қайта суд қилинади
Андрес Фелипе Валенсия Барриентос июль ойида бир нечта жинсий жиноятларда айбсиз деб топилган эди, бироқ ҳакамлар ҳайъати учта зўрлаш айблови бўйича бир қарорга кела олмади.
Британиялик рэпер Yung Filly аввалги суд жараёнида ҳакамлар ҳайъати бир қарорга кела олмаганидан кейин, келаси йилнинг июнь ойида Австралияда зўрлаш айблови бўйича қайта суд қилинадиган бўлди.
Июль ойида ҳақиқий исми Андрес Фелипе Валенсия Барриентос бўлган 31 ёшли рэпер ҳакамлар ҳайъати томонидан учта зўрлаш, битта ҳужум қилиш ва битта бўғиш айбловлари бўйича оқланган эди, бироқ иккита тан жароҳати етказиш жиноятида айбдор деб топилганди. Ҳакамлар ҳайъати яна учта зўрлаш айблови бўйича якуний қарорга кела олмаган.
Ўша пайтда 20 ёшда бўлган мухлиса қизнинг таъкидлашича, Барриентос 2024 йилда Ғарбий Австралиянинг Перт шаҳридаги концертдан сўнг, ўзининг меҳмонхона хонасида уни бир неча бор зўрлаган ва унга ҳужум қилган.
Судда аввалроқ Барриентос ва аёл ўртасида жинсий алоқа ўзаро розилик асосида бошлангани, бироқ кейинчалик у зўравонлик тусини олгани ва эркак тўхтамагани ҳақидаги кўрсатмалар тингланган эди.
Жума куни Перт округ суди қайта суд жараёни бошланадиган санани 15 июнь деб белгилади. Суд саккиз кун давом этиши кутилмоқда.
Барриентос суд мажлисида шахсан иштирок этиши шарт эмас эди. Суд уни гаров эвазига озод қилиш шартлари асосида Австралияни тарк этишига рухсат берганидан кейин, у Буюк Британияга қайтгани маълум қилинган.
Июль ойида чиқарилган иккита тан жароҳати етказиш бўйича айблов ҳукми қайта суд жараёнидан кейин эълон қилинади.
Колумбияда туғилган ва Буюк Британияда улғайган Барриентос YouTube'даги «Beta Squad» жамоаси билан олиб борган фаолияти орқали танилган.
У шунингдек, Channel 4 телеканалидаги «Bake Off» кўрсатувининг машҳурлар сонида иштирок этган ва BBC Three дастурларини олиб борган.