Британиялик келин сунъий киприкларга аллергия сабаб тўйдан бир неча ҳафта олдин кўриш қобилиятини йўқотди
Кембрижшир графлигида яшовчи британиялик Полли Бибби сунъий киприкларга аллергик реаксия туфайли тўйидан бир неча ҳафта олдин кўриш қобилиятини йўқотди, дея хабар беради Кеннедй Невс анд Медиа агентлиги.
Полли Бибби тўй куни ўзини “малика”дек ҳис қилиш мақсадида сунъий киприк қўйдиришга қарор қилган. Дастлабки синовдан сўнг, бўлажак келин 5-июл куни ушбу косметик муолажани амалга оширган ва натижадан мамнун бўлган. Бироқ, бир неча соат ўтгач, унда аллергик реаксия бошланган.
26 ёшли Биббининг сўзларига кўра, унинг кўзлари аввал ёшланиб, оғрий бошлаган, кейин эса ачишиб, ёпишиб қолган ва ажралмалар пайдо бўлган. Хавотирланган келин тез ёрдамга мурожаат қилган ва унга шифохонага бориш тавсия этилган. Хинчингбрук шифохонасида ўтказилган текширувлар натижасида беморда киприк қўйдиришга нисбатан аллергик реаксия юзага келгани тасдиқланган. Биббига антибиотиклар ва антигистамин препаратлар буюрилган, шиш қайтганидан сўнг сунъий киприкларни олиб ташлаш маслаҳат берилган.
Бибби ташқи кўринишининг даҳшатли бўлишидан ташқари, кўзларида кучли оғриқ ҳам ҳис қилган. У шундай эслайди: “Кўзим ачишиб, ёнаётганди, охири кўриш қобилиятимни йўқота бошладим ва умуман ҳеч нарсани кўрмай қолдим. Ҳар сафар юмиб-очганимда, кўзимдан ажралма йиғилгани учун қовоқларим ёпишиб қоларди”.
Сунъий киприкларни олиб ташлаш муаммони дарҳол ҳал қилмаган. Бибби бу ҳолатни “Гўё юзимга кислота қуйилгандек бўлди”, дея таърифлаган.
Бибби бошқа келинларни тўйдан сал олдин янги муолажалар қилдиришдан огоҳлантириш мақсадида ўз тажрибаси билан ўртоқлашди. 27-июл куни Бенжамин Мейга турмушга чиққан келинчак шундай дейди: “Одамлар ҳазиллашиб, тўй куни қандайдир бир кўнгилсизлик юз беради, дейишганида, бу айнан мен билан содир бўлишини хаёлимга ҳам келтирмагандим. Бу оғриқ бунга арзимайди. Агар буни олдиндан билганимда, шунчаки тушдан фойдаланган бўлардим”.
Медисал Невс Тодай нашрига кўра, киприк қўйдириш қовоқлар ва кўзларда аллергик реаксияларга сабаб бўлиши мумкин. Аллергик реаксия муолажадан бир неча дақиқа ўтиб пайдо бўлади ва одатда сунъий киприкларни ёпиштириш учун ишлатиладиган елимга бўлган аллергия туфайли юзага келади.