Британияда эркак ўргимчак чақиши ортидан комага тушиб қолди

Британиялик Питер Мерфи заҳарли ўргимчак чақиши туфайли комага тушиб, мўжизавий тарзда ҳаётга қайтди. Бу воқеа унинг ҳаётини тубдан ўзгартиришга ундади. Оғир касаллик ва яқинларининг кетма-кет вафоти унинг сезиларли даражада вазн йўқотишига сабаб бўлди.

Неед То Кнов нашрининг хабар беришича, Мерфи ўз ётоғида шаффоф, скелецимон танали ва қизил кўзли ғалати ўргимчакни кўрган. У уни эҳтиёткорлик билан ушлаб, ташқарига чиқариб юбормоқчи бўлганида, ҳашарот уни чақиб олган. Қисқа вақт ичида унинг қўли шишиб, қизариб кетган, бир неча кун ўтгач эса у нормал гапира олмай қолган.

Касалхонада унга некротик фассит ташхиси қўйилган. Бу тўқималарнинг тезда ўлишига олиб келадиган жиддий бактериал инфексия ҳисобланади. Эркак тўрт кун комада ётган ва тўртта операцияни бошдан кечирган. У эшитган энг охирги нарса шифокорларнинг аёлига берган маслаҳати бўлган: агар инфексия қўл бўйлаб юқорига тарқалса, уни кесиб ташлашга мажбур бўлишлари ҳақида.

“Ўша пайтда бутун ҳаётим кўз олдимдан ўтди”, дейди у.

Бу вақт ичида унинг акаси ва опаси ҳам вафот этган. Соғайиб кетгач, Мерфи ҳаётини ўзгартиришга қарор қилди. У аввал ҳам ортиқча вазн билан курашиб келган эди, касалхонадан чиққач эса янада семириб кетди. Шундан сўнг у озишга қарор қилди ва 42 килограмм вазн йўқотди.

Унга бу ишда аёли ёрдам берди. Улар биргаликда тўйимли инглиз нонуштаси, торт, кабоб, сендвич ва чипсдан воз кечди ҳамда мунтазам бадминтон ўйнашни бошлади. Турмуш ўртоғидан ўрнак олган аёл ҳам 22 килограммга озди.

“Ўзгариш учун ҳеч қачон кеч эмас”, деди Мерфи.