Британияда бедарак йўқолган мушук 10 йил ўтиб уйга қайтди

Британияда 10 йил аввал ғойиб бўлган мушук ўз уйига қайтди. Бу ҳақда ББС хабар берди.

Чарли исмли мушук 2016-йилнинг апрел ойида йўқолган эди. Унинг эгалари Люси ва Ханна Роберцонлар уни топиш учун ҳаракат қилишган. Ханна шундай деди: "Бизда бир-иккита маълумот бор эди... уни топишга ҳаракат қилдик, лекин топа олмадик. Биз ҳеч қачон умидимизни узмадик."

Люсининг айтишича, у атрофдагилардан сўраб-суриштирган ва Фасебоокъда пост қолдирган бўлса-да, Чарлидан ҳеч қандай дарак бўлмаган. "Бу жуда оғриқли эди. Биз уни машина уриб кетганидан ёки нобуд бўлганидан қўрқдик," деди у.

Аммо 2026-йил 29-июл куни Ханна Аберкарн шаҳридаги ветеринария клиникасидан Чарли топилгани ҳақида қўнғироқ олгач, ҳайратда қолганини айтди. Яқин атрофда яшовчи бир шахс Чарлини буталар орасида кўриб қолган ва уни қаровсиз деб ўйлаб, бир неча ҳафта давомида овқатлантириб юрган. Кейин у мушукни ветеринарга олиб борган. Шифокор эса микрочипдаги рақам орқали Ханнага қўнғироқ қилган. Ветеринар мушукнинг ўн йилдан бери йўқолганини билиб, ҳақиқатан ҳам ҳайратда қолгани таъкидланди.

Люси мушукнинг кўриниши унчалик ўзгармаганини, худди эски суратлардагидек эканлигини айтди. У мушукни бошқа уй ҳайвонлари билан бирга яшашга кўниктириш жараёни давом этаётганини билдирди. "Ҳозирча у ўзининг машҳур эканини ҳис қиляпти деб ўйлайман," дея хулоса қилди у.

Аввалроқ АҚШнинг Вашингтон штати соҳилларида ташлаб кетилган қайиқда 60 та мушук топилиб, улар қутқариб олинганди. Полиция ва ҳайвонларни муҳофаза қилиш хизмати ходимлари бир ҳафта давомида кемани кўздан кечириб, ҳайвонларни эҳтиёткорлик билан олиб чиққан. Шу тариқа 11-август куни охирги мушук ҳам қутқариб олинган эди.