Британия Украинага қурол етказиб берувчи компанияларни Россия ҳужумлари хавфидан огоҳлантирди — Даилй Маил
Британия Украинага қурол етказиб берувчи компанияларни Россия ҳужумлари хавфидан огоҳлантирди — Даилй Маил
"Тҳе Даилй Маил" нашрининг хабар беришича, Британия мудофаа компанияларининг Украинага қурол-яроғ етказиб берувчи раҳбарлари Россия жосуслари нишонига айланиши мумкинлиги ҳақида огоҳлантирилган.
Нашр манбасининг маълумотига кўра, ёз бошида Британия ҳукуматининг юқори мартабали амалдорлари мудофаа компаниялари раҳбарлари билан давра суҳбати ўтказиб, уларга ва уларнинг ходимларига нисбатан Кремл томонидан таҳдиднинг кучайганини билдирган.
Учрашувда қайси компаниялар раҳбарлари иштирок этгани аниқ айтилмаган бўлса-да, улар Украина учун қурол-яроғ ва дронлар етказиб берувчи компаниялар бўлгани тахмин қилинмоқда.
Украинага қурол етказиб бериши билан танилган бир қатор мудофаа компаниялари аллақачон жамоатчилик эътиборига тушган. Буларга Ғарбий Суффолкдаги РАФ Милденҳалл ҳарбий базаси яқинида жойлашган, Украина учун дронлар ишлаб чиқарувчи Укрспессйстемс киради.
Шунингдек, БАЕ Сйстемс компаниясининг шўба корхонаси Саллен-Ленз ҳам Украинага дронлар етказиб беради. Ушбу дронлар яқинда Россия ҳудудидаги нефтни қайта ишлаш заводларига қилинган ҳужумларда ишлатилган.
Яна бир йирик компания — МБДА бўлиб, у Украина Россияга қарши ҳужумларда қўллаётган Сторм Шадов қанотли ракеталарини ишлаб чиқаради.
Британия Ташқи ишлар, Ҳамдўстлик ва тараққиёт вазирлиги бу учрашувни Германиянинг икки мудофаа компанияси раҳбарларига қарши Россия томонидан уюштирилгани айтилган суиқасд режаларининг фош этилишидан сўнг ўтказган. Улардан бири Украинага артиллерия снарядлари етказиб бериш бўйича 4,2 миллиард фунт стерлинглик шартномага эга бўлган мудофаа гиганти Рҳеинметалл бош директори Армин Паппергер эди.
Атлантика кенгаши таҳлил маркази хавфсизлик бўйича эксперти Элизабет Браувнинг таъкидлашича, Буюк Британия ва Европадаги мудофаа компаниялари раҳбарлари ўз хавфсизлиги ҳамда компаниялар обьектларини ҳимоя қилиш масаласига жиддийроқ эътибор қаратишни бошлаган.
Россия Мудофаа вазирлиги олинган кўрсатмаларга мувофиқ Украина энергетика обьектларига оммавий зарбалар беришга тайёргарликни бошлаганини маълум қилган эди. Вазирлик бу чорани Киев режимининг Россия фуқаролик инфратузилмаси ҳамда ёнилғи-энергетика мажмуасига давом этаётган ҳужумларига жавоб деб атаган.