Британия Россия таҳдидига қарши Совуқ уруш давридаги мудофаа тизимини қайта тикламоқчи
Буюк Британияда Россиянинг Шимолий Атлантикадаги фаоллиги ва стратегик инфратузилмаларга эҳтимолий саботажидан хавотир кучаймоқда. Лондонда Шетланд ороллари яқинида Совуқ уруш давридагидек ҳарбий иштирокни тиклаш, сувости алоқа кабелларини эса янада кучлироқ ҳимоялаш таклиф қилинмоқда.
Британия Россия таҳдидига қарши Совуқ уруш давридаги мудофаа тизимини қайта тикламоқчи
Шотландия расмийлари Россиянинг эҳтимолий саботаж ҳаракатларидан ҳимояланиш учун Шетланд ороллари яқинида Буюк Британиянинг ҳарбий иштирокини қайта тиклаш зарурлигини айтмоқда. Хусусан, Шимолий Атлантикадаги сувости алоқа кабеллари ҳамда мамлакатнинг замонавий космодроми хавфсизлиги борасидаги хавотирлар кучайган.
Расмийлар Россия Шимолий Атлантикадаги Британия сувости алоқа кабеллари устида ҳаракатланаётган тижорий балиқ овлаш кемаларидан фойдаланаётганини таъкидламоқда. Уларнинг фикрича, бу кемалар орқали муҳим инфратузилмани кузатиш ва эҳтимолий саботаж ҳаракатларини амалга ошириш мумкин.
Шунингдек, Буюк Британиянинг энг шимолий ҳудудида жойлашган Унст оролидаги СахаВорд космодромида ишлаб чиқилаётган ракета ва сунъий йўлдош технологиялари Россия президенти Владимир Путиннинг эътиборида бўлиши мумкинлиги айтилмоқда.
Ўтган ой Шотландия биринчи вазири Жон Суинней мамлакат хорижий душман кучларнинг таҳдидларига қарши етарлича ҳимояланмаганини билдирган эди. Бироқ жума куни Буюк Британиянинг шимолига ташрифи чоғида мудофаа вазири Уес Стритинг унинг бу гапларини танқид қилиб, масъулияциз ва асоссиз деб атади.
Айни шу куни Шотландия яқинидаги сувларда Россиянинг “Везувиан” нефт танкери ҳам қайд этилди.
Шетланд ороллари вакили, Либерал-демократлар партияси депутати Алистер Кармикл Шотландия қирғоқлари яқинида Россия балиқ овлаш кемалари тобора кўпроқ кўринаётганини айтиб, Атлантика океанида Британия қуролли кучларининг доимий ҳарбий навбатчилигини йўлга қўйишга чақирди.
Унинг сайлов округи бўлган Шетланд оролларида 2022-йилда яқин атрофдаги сувости кабелининг шикастланиши оқибатида электр таъминоти узилиб, ороллар бир муддат қоронғиликда қолган эди.
Яқинда ўтказилган таҳлилга кўра, Россия кемалари халқаро телекоммуникация алоқаларининг катта қисмини таъминлайдиган сувости кабеллари яқинида 500 мартадан ортиқ қайд этилган. Бундай кабелларга саботаж уюштирилиши мамлакатнинг ҳаётий инфратузилмасини издан чиқариши, ҳатто фавқулодда хизматлар фаолиятини фалаж қилиши мумкин.
Кармикл ҳукуматни оролларга туташ сувларда “доимий ва мақсадли” ҳарбий иштирокни қайта тиклашга чақирди.
“Совуқ уруш йилларида Унст оролидаги СахаВорд қироллик ҳарбий-ҳаво кучлари радиолокация стансияси мамлакатимизнинг шимолдаги мудофаа чизиғи эди. У 20 йил олдин қисқартирилган”, деди депутат.
Мазкур хавотирлар кучайгани ортидан Буюк Британия ҳукумати ўтган ҳафта эълон қилган ҳужжатда янги жиноий жазолар тизимини жорий этиш бўйича таклифларни илгари сурди. Унга кўра, сувости кабелларига зарар етказган шахсларни қамоқ жазоси кутиши мумкин.
Бироқ Кармикл бундай чоралар яхши ният билан таклиф этилган бўлса-да, амалда кўпроқ рамзий аҳамиятга эга бўлишини таъкидлади.
Агар Россия Солсберига “Новичок” билан қуролланган одамларни юборишга тайёр бўлса, Британия суди олдида жавоб бериш таҳдиди уларни тўхтата олмайди, деди у.
Депутат Путиннинг Шимолий ороллар, хусусан, космодром фаолиятига қизиқиши мумкинлигидан ҳам хавотир билдирди.
“Ҳар қандай таҳдидга жиддий қарашимиз керак. Айниқса, ҳозир Шетланд оролларида вертикал ракета учириш учун космодром қуриш имкониятини кўриб чиқаётган бир пайтимизда”, деди Кармикл.
Унинг фикрича, СахаВорд космодромининг ривожланиши ва унинг стратегик аҳамияти ҳудуд хавфсизлигини кучайтиришни талаб қилади.