Босқичма-босқич яхши жамоа шакллантиряпмиз, тўғри йўналишдамиз - Каннаваро
Ўзбекистон миллий жамоаси бош мураббийи Фабио Каннаваро Сурия устидан қозонилган 4:1 ҳисобидаги ғалабадан мамнунлигини билдириб, футболчилар қисқа вақт ичида янги тактик тизим ва унинг ғояларини яхши ўзлаштирганини таъкидлади.
Босқичма-босқич яхши жамоа шакллантиряпмиз, тўғри йўналишдамиз - Каннаваро
– Биз бу ўйинга яхши тайёргарлик ва юқори кайфият билан келдик. Барча футболчилар биргаликда, аҳил жамоа сифатида ишламоқда. Ўйиндан олдин йигитларга «ўртоқлик ўйини» деган тушунча йўқлигини, ҳар бир учрашувга жиддий ёндашиш кераклигини айтдим. Улардан юқори темпда ва интенсив ўйнашни сўрадим. Биз ҳали кўп жиҳатдан ривожланишимиз керак. Аммо босқичма-босқич яхши жамоа шакллантириб боряпмиз.
– Энди Жанубий Кореяга (6-октабрда) қарши қийин сафар учрашуви кутиб турибди. Барча футболчиларнинг ҳолати яхши ва биз тўғри йўналишда ҳаракат қилишимиз керак.
– Мен барча футболчиларнинг бир хил темпда шуғулланишини хоҳлайман ва ҳаммага бирдек қарайман. Менда «асосий таркиб» ёки «захира футболчиси» деган тушунча йўқ. Бугун айрим футболчиларни алмаштириш ва бошқаларга ҳам ўзини кўрсатиш имкониятини бериш муҳим эди.
– Одамлар ўйин осон кечди деб ўйлаши мумкин. Аммо биз тўғри бошлаганимиз, кўп югурганимиз ва тўғри прессинг қилганимиз сабабли баҳсни ўзимиз учун енгиллаштирдик. Сурия осон рақиб эмас. Биз уларнинг Иорданияга қарши ўйинини кузатдик, ўша баҳс 1:1 ҳисобида якунланган эди. Шунинг учун бу учрашувга ҳам жиддий тайёрландик.
– Мен учун натижадан кўра, жамоанинг характери ва жамоавий ўйин кўрсатиши муҳимроқ. Эронга қарши баҳсда ҳам буни кўрсатдик. Улар Осиёдаги энг кучли жамоалардан бири.
– Албатта, доим ҳам мукаммал ўйнаб бўлмайди. Биз машғулотларда барча жиҳатлар - ҳимоядан тўп билан чиқишдан тортиб стандарт вазиятларгача ишлаяпмиз. Асосий эътибор қаратишимиз керак бўлган жиҳатлардан бири - босим ўтказиш учун қулай вақтни ҳис қилиш.
– Жаҳон чемпионатида топ жамоаларга қарши ўйнаб, бундай баҳсларда интенсив ва агрессив бўлиш қанчалик муҳимлигини кўрдик. Кучли жамоага қарши ноқулай вақтда прессинг қилсангиз, рақиб бу вазиятдан осон чиқиб кетади. Шунинг учун футболчиларга қачон олдинга чиқиб босим ўтказиш кераклигини ўргатяпмиз.
– Футбол - вақт ва ҳудуд ўйини. Тўп рақибда бўлса, унга ўйлаш учун вақт қолдирмаслик мақсадида ҳудудни торайтиришимиз керак. Тўп бизда бўлганда эса, аксинча, кўпроқ вақтга эга бўлиш учун бўш ҳудудларни кенгайтиришимиз лозим. Агар тўғри вақтда прессинг қилмасангиз, ҳатто кучсиз жамоага қарши ҳам муаммога дуч келишингиз мумкин. Сўнгги кунларда футболчилар биз улардан нимани талаб қилаётганимизни яхши тушуниб олишганидан хурсандман.