Боснияда Россияга яқин Додикнинг номзодлари олдинга чиқди
Босния ва Ҳерсеговинада ўтказилган сайловларнинг дастлабки натижаларига кўра, Серб Республикасининг собиқ президенти Милорад Додик қўллаб-қувватлаган номзодлар етакчилик қилмоқда. Саво Минич минтақа президентлиги учун курашда олдинда, Додикнинг сафдоши Желка Свиянович эса мамлакат президиумидаги ўрнини сақлаб қолиши кутилмоқда.
Боснияда Россияга яқин Додикнинг номзодлари олдинга чиқди
ДВ хабарига кўра, Марказий сайлов комиссияси 4-октабр, якшанба куни кечқурун овоз беришнинг дастлабки натижаларини эълон қилган. Сайловчилар мамлакат президиуми аъзолари, марказий ва икки минтақавий парламент депутатлари, шунингдек, Серб Республикаси президентини танлаган.
Бюллетенларнинг 95 фоизи санаб чиқилганда, президиумда босниялик мусулмонлар — босняклар вакили бўлиш учун курашда Денис Бечирович қарийб 38 фоиз овоз билан етакчилик қилган. У бунгача президиум раиси лавозимида ишлаган.
Хорватлар вакили учун сайловда Дарияна Филипович тахминан 48 фоиз овоз билан олдинда бўлган. Серблар вакили сифатида эса амалдаги президиум аъзоси Желка Свиянович қарийб 55 фоиз овоз тўплаган.
Босния ва Ҳерсеговинада давлат раҳбари вазифасини уч кишидан иборат президиум бажаради. Унда босняклар, хорватлар ва серблар биттадан вакилга эга. Бу бошқарув тизими мамлакатдаги фуқаролик урушига нуқта қўйган 1995-йилги Дейтон келишувлари асосида шаклланган.
Сайловдаги асосий рақобатлардан бири Босния ва Ҳерсеговина таркибидаги, аҳолининг асосий қисмини серблар ташкил этувчи Серб Республикаси президентлиги учун кечган. Унда минтақа бош вазири Саво Минич ва мухолифат номзоди Бранко Блануша беллашган.
Дастлабки натижаларга кўра, Минич аксарият сайлов округларида рақибидан ўзиб кетган. Блануша айрим округларда устун келган бўлса-да, Марказий сайлов комиссияси маълумотлари умумий ҳисобда Минич олдинда эканини кўрсатган.
Минич ҳам, Свиянович ҳам Милорад Додик асос солган «Мустақил социал-демократлар иттифоқи» партиясидан номзод бўлган. Мазкур партия Серб Республикаси парламенти — Халқ скупштинаси сайловида ҳам етакчилик қилмоқда. Мамлакат парламентининг қуйи палатасига сайловда ҳам босниялик сербларнинг аксарияти шу партияни қўллаб-қувватлаган.
Додик Минич ва Свияновични ғалаба билан табриклашга улгурган. Нашрнинг қайд этишича, Додик 2025-йилда Босния ва Ҳерсеговина Конституциявий суди қарорлари ҳамда халқаро келишувларни бажармагани учун президентлик лавозимидан мажбуран четлаштирилган. Суд унга олти йил давомида сиёсий фаолият билан шуғулланишни ҳам тақиқлаган.
Россияга яқинлиги билан танилган Додик суд қарорини тан олмаган ва қўллаб-қувватлаш излаб Москвага борган. У Саво Минич билан бирга 29-сентабр куни Кремлда Владимир Путин билан учрашган.