Бортида 6 киши бўлган тиббий самолёт Массачусетс қирғоқлари яқинида ғойиб бўлди
Парвоз маълумотларига кўра, самолёт баландликни сезиларли даражада йўқотганидан кейин парвоз назоратчилари билан алоқани йўқотган.
Бортида 6 киши бўлган тиббий самолёт Массачусетс қирғоқлари яқинида ғойиб бўлди
АҚШ расмийлари шанба куни эрталаб Массачусетс штатининг Бостон шаҳрига йўл олган тиббий самолёт ғойиб бўлганидан кейин олти кишини қидирмоқда.
Федерал авиация бошқармаси BBC'га Gulfstream G-100 самолёти билан алоқа йўқолганини маълум қилди ва маҳаллий вақт билан соат 1:00 дан (Гринвич бўйича 6:00) кейин қидирув-қутқарув ишлари ҳақида эълон берди.
АҚШ Соҳил хавфсизлик хизматининг Шимоли-шарқий округи маълумотларига кўра, Массачусетс ороли бўлган Нантакет қирғоқлари яқинида ҳаво ва сувда қидирув ишлари олиб борилмоқда.
FlightAware парвоз маълумотлари шуни кўрсатадики, самолёт Бермуд оролларидаги L.F. Wade халқаро аэропортидан маҳаллий вақт билан соат 23:40 да ҳавога кўтарилган ва Бостоннинг Логан халқаро аэропортига Шарқий кундузги вақт билан соат 1:30 да (Гринвич бўйича 6:30) қўниши керак эди.
Соҳил хавфсизлик хизмати томонидан эълон қилинган борт рақамига кўра, самолёт уйига қайтаётган беморлар учун халқаро тиббий парвозларни амалга оширувчи Latitude Air Ambulances компаниясига тегишли бўлган.
FlightAware кузатув тизими самолёт билан алоқа йўқолишидан олдин унинг баландлиги кескин пасайганини, яъни тахминан 7 300 метрдан (24 000 фут) 3 300 метргача (11 000 фут) тушиб кетганини кўрсатмоқда.