Болаларга нисбатан жинсий жиноятлар учун умрбодлик жазо тўғрисидаги қонун Сенатга юборилди. Видео
Болаларга нисбатан жинсий жиноятлар учун умрбодлик жазо тўғрисидаги қонун лойиҳаси Сенатга юборилди. Видео
Олий Мажлис Қонунчилик палатаси депутатлари болаларни зўравонликнинг барча шаклларидан ҳимоя қилишни кучайтиришга қаратилган қонун лойиҳасини маъқулладилар ва уни кўриб чиқиш учун Сенатга юбордилар.
Гап «Болаларни зўравонликнинг барча шаклларидан ҳимоя қилиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси ҳақида бормоқда.
Бундан аввал, 30 сентябрь куни Олий Мажлис Қонунчилик палатаси депутатлари ушбу қонун лойиҳасини иккинчи ўқишда қабул қилган эди. Ўшанда 14 ёшга тўлмаган болаларни зўрлаганлик ва жинсий эҳтиёжни зўрлик ишлатиб ғайритабиий шаклда қондирганлик учун 25 йилгача озодликдан маҳрум қилиш ёки умрбод озодликдан маҳрум қилиш жазосини белгилаш таклиф этилаётгани хабар қилинганди.
Ҳужжатда, шунингдек, зўравонлик қурбони ёки гувоҳи бўлган болалар билан ишлаш тартибига ўзгартиришлар киритиш кўзда тутилган. Хусусан, вояга етмаганларни сўроқ қилишни мажбурий тартибда видеотасвирга олиш, жабрланган болаларга эса давлат ҳисобидан юридик ёрдам кўрсатиш режалаштирилмоқда.
Бундан ташқари, қонун лойиҳаси билан боланинг ўлимига қасддан сабаб бўлган жиноятлар учун шартли ҳукм қилиш ва жазодан муддатидан илгари шартли озод қилишни чеклаш таклиф этилмоқда. Болаларнинг жинсий эркинлигига қарши бир қатор жиноятлар бўйича жавобгарликка тортиш ва жазони ижро этиш муддатларини қўлламаслик ҳам режалаштирилган.
Энди қонун лойиҳасини Сенат кўриб чиқиши керак.