Болалар омбудсмани Намангандаги боғчада содир этилган зўравонлик ҳолати юзасидан вазирликка тақдимнома киритди

Болалар омбудсмани Намангандаги боғчада юз берган зўравонлик ҳолати бўйича вазирликка тақдимнома йўллади

Болалар омбудсмани мактабгача таълим ташкилотида тарбияланаётган болага нисбатан содир этилган жинсий зўравонлик ҳолати юзасидан Мактабгача ва мактаб таълими вазирлигига тақдимнома киритди.

Болалар омбудсмани тақдимномасида мазкур воқеа бўйича ўтказилаётган хизмат текшируви натижаларини танқидий баҳолаш, аниқланган камчиликларни бартараф этиш ва масъул ходимларни белгиланган тартибда жавобгарликка тортиш чораларини кўриш зарурлиги таъкидланган.

Шунингдек, ҳодисанинг юз беришига имкон берган сабаб ва шарт-шароитларни йўқотиш, келгусида бундай ҳолатлар такрорланишининг олдини олиш ҳамда уларнинг олдини олиш бўйича зарур чоралар кўриш талаб қилинган.

Тақдимномада республиканинг барча мактабгача таълим ташкилотларида болалар хавфсизлигини қатъий таъминлаш бўйича чораларни кучайтириш зарурлиги қайд этилган.

Жумладан, ташкилотлар ходимларининг касбий вазифаларини бажариши устидан масъуллар томонидан манзилли текширувлар ўтказиш, болалар хавфсизлигини таъминлашга қаратилган ички назорат механизмларини қайта кўриб чиқиш ва аниқланган камчиликларни бартараф этиш сўралган.

Қонунчиликка мувофиқ, Мактабгача ва мактаб таълими вазирлиги тақдимнома ижроси юзасидан амалга оширилган ишлар ҳақида 15 кун муддатда Болалар омбудсманига маълумот бериши лозим. Ҳисоботга тегишли ҳужжатларнинг нусхалари ҳам илова қилиниши керак.

Болалар омбудсмани давлат органлари фаолиятида бола ҳуқуқларига риоя этилиши устидан парламент назоратини амалга оширишда давом этишини билдирган.

Эслатиб ўтамиз, Наманган вилояти Учқўрғон туманидаги давлат мактабгача таълим ташкилотларидан бирида 5 ёшли тарбияланувчига нисбатан жинсий зўравонлик содир этилгани ҳақида хабар берилди.

52 ёшли гумонланувчи процессуал тартибда ушланиб, унга нисбатан қамоқ эҳтиёт чораси қўлланган.