Бобур Бекмуродов: Педофиллар учун ўлим жазоси болалар учун хавф туғдиради
«Миллий тикланиш» партияси етакчиси Алишер Қодиров педофиллар ва қотиллар учун ўлим жазоси тарафдори эканини яна бир бор маълум қилди. ЎзЛиДеП депутати ва «Юксалиш» раҳбари Бобур Бекмуродов бу ягона гувоҳ сифатида болаларнинг ўзлари учун хавф туғдиришини айтиб жавоб қайтарди ва суд хатолари эҳтимолини эслатиб ўтди.
Бобур Бекмуродов: Педофиллар учун ўлим жазоси болалар учун хавф туғдиради
29 сентябрь куни Ўзбекистон Олий Мажлиси Қонунчилик палатасидаги партиялар фракциялари болаларга нисбатан зўравонликнинг барча турлари, жумладан, жинсий зўравонлик учун жавобгарликни кучайтиришга қаратилган қонун лойиҳасини кўриб чиқишга киришди. Бу Наманган вилояти Учқўрғон туманидаги давлат боғчасининг 5 ёшли тарбияланувчисига нисбатан жинсий зўравонлик содир этилгани ҳақидаги шов-шувли иш фонида юз бермоқда.
Бундан олдин «Миллий тикланиш» партияси етакчиси Алишер Қодиров ушбу таклиф бўйича овоз беришда бетараф қолишини маълум қилган эди. У икки кун аввал эълон қилган ўз фикрини яна бир бор такрорлаб, педофилия ва қасддан одам ўлдириш, айниқса, болаларни ўлдирганлик учун ўлим жазосини қайтариш зарурлигини таъкидлади.
Депутат 2011 йилда Ослода 77 кишининг ҳаётига зомин бўлган ва 300 дан ортиқ кишини жароҳатлаган йирик теракт ташкилотчиси, 21 йиллик қамоқ жазосини ўтаётган «норвегиялик маҳлуқ» Андерс Брейвикни эслатди. «Биз кимдан ўрнак оляпмиз?» — дея сўради у ва «агар бизнинг педофилимиз ҳам шароит сўраса, унга ҳам шароит яратиб беришга мажбур бўламиз», деб қўшимча қилди.
Алишер Қодировнинг фикрича, ўлим жазоси оғир жиноятларнинг олдини олишга хизмат қилади.
ЎзЛиДеП депутати ва «Юксалиш» ҳаракати раҳбари Бобур Бекмуродов Алишер Қодировга эътироз билдирди.
У болаларга нисбатан жиноят содир этган шахсларга бериладиган жазо қаттиқ ва муқаррар бўлиши кераклигини таъкидлади: умрбод озодликдан маҳрум қилиш, афв этиш имкониятини бутунлай истисно қилиш ва муддатидан олдин озодликка чиқишни тақиқлаш.
Ўлим жазосини қўллаш эса, биринчидан, Конституцияга зиддир. Иккинчидан, бу болаларнинг ўзлари учун хавф туғдириши мумкин.
«Агар болани зўрлаш ҳам, ўлдириш ҳам ўлим жазоси билан жазоланадиган бўлса, жиноятчига ягона гувоҳни, яъни боланинг ўзини ҳаётдан маҳрум қилишга ҳеч нарса тўсқинлик қилмайди», — деди у.
«Биз халқаро мажбуриятларимизни ва суд хатолари эҳтимолини доимо ёдда тутишимиз керак», — дея қўшимча қилди Бобур Бекмуродов.
«Болаларни ҳимоя қилиш бўйича асосий саъй-ҳаракатлар бошқа нарсага қаратилиши керак деб ҳисоблайман. Бу жинсий жиноятлар содир этган шахслар реестрини юритиш ва уларнинг болалар билан ишлашини умрбод тақиқлаш, мактаб ва маҳаллаларда хавфни эрта аниқлаш, тергов ҳаракатларини тезкор ва кечиктирмасдан ўтказиш, шунингдек, жабрланувчи болаларга психологик ёрдам кўрсатишдир», — деди у.
Бундан олдин ЎзЛиДеП фракцияси йиғилишида болаларга нисбатан шилқимлик қилиш ҳолатлари жиноят эмас, балки маъмурий ҳуқуқбузарлик сифатида нотўғри таснифланаётгани каби муаммо ҳам тилга олинган эди.
Расмий маълумотларга кўра, 2023 йилда ҳуқуқни муҳофаза қилувчи органларга вояга етмаганларга нисбатан жинсий шилқимлик қилиш бўйича 56 та материал келиб тушган. 2024 йилда бу кўрсаткич 129 тани, 2025 йилда эса 141 тани ташкил этган. 2026 йилнинг биринчи ярмида бундай материаллардан 44 таси келиб тушган.
Таҳлиллар шуни кўрсатдики, айрим ҳолларда жиноят аломатлари сифатида кўриб чиқилиши мумкин бўлган ҳаракатлар маъмурий ҳуқуқбузарлик сифатида расмийлаштирилган.
Уч йил давомида 44 та ҳолатда жиноятлар яширилиб, маъмурий ҳуқуқбузарлик сифатида тақдим этилган.