БМТ Хавфсизлик кенгаши сентябрда Эрон бўйича санксиялар мониторинги масаласида овоз беради
БМТ Хавфсизлик кенгаши сентябр ойида Эрон бўйича санксияларни мониторинг қилувчи экспертлар гуруҳининг ваколатини узайтириш масаласида овоз беради.
Овоз бериш 17-сентябрга режалаштирилган бўлиб, гуруҳнинг ваколати 26-сентябрда, БМТ Бош Ассамблеясининг навбатдаги сессияси даврида тугайди.
Франсиянинг БМТдаги доимий вакили Жером Боннафоннинг таъкидлашича, Эроннинг ядровий дастури ва унинг БМТ олдидаги мажбуриятларига риоя қилмаслиги сентябр ойида Хавфсизлик кенгаши муҳокамаларининг асосий мавзуларидан бири бўлади. Экспертлар гуруҳи Эрон бўйича санксиялар қўмитасининг фаолиятини қўллаб-қувватлайди.
Ушбу овоз бериш Россия ва Хитой билан зиддиятга сабаб бўлиши мумкин. Ҳар икки давлат Эрон бўйича санксиялар режимига ва унинг ижросини назорат қилувчи механизмларга қарши чиқмоқда. Россия ва Хитой 2026-йил март ойида Хавфсизлик кенгаши Эрон бўйича санксиялар қўмитаси ва экспертлар гуруҳини қайта тиклаш ваколатига эга эмаслигини билдирган.
Эрон бўйича келишмовчилик 2025-йилда Буюк Британия, Франсия ва Германия томонидан БМТнинг “снапбаск” механизми ишга туширилиши ортидан кучайган. Натижада 2015-йилги Эрон ядровий келишуви доирасида бекор қилинган санксиялар қайта тикланган. Ғарб давлатлари Теҳронга ядровий дастур бўйича мажбуриятларини бажармаётганлик айбини қўйган.
Эрон ядровий қурол яратишга интилаётганини рад этади. Бироқ мамлакатнинг уранни бойитиш дастури АҚШ ва унинг иттифоқчиларида хавотир уйғотиб келмоқда. Бойитилган уран электр энергияси ишлаб чиқаришда ҳам, ядровий қурол яратишда ҳам қўлланилиши мумкин.
Эрон АҚШ санксияларига қарамай етарли хорижий валюта захирасига эга. Бу ҳақда 1-сентябр куни Эрон Марказий банки раиси Абдолносир Ҳимматий маълум қилганди. Аввалроқ АҚШ молия вазири Скотт Бессент Теҳрон иқтисодий урушда ютқазаётгани сабабли кескин чоралар кўраётганини айтган.