БМТ Бош Ассамблеяси учта янги халқаро кунни эълон қилди
БМТ Қозоғистон, Тожикистон ва Сурия ташаббуси билан учта янги халқаро кунни таъсис этди.
БМТ Бош Ассамблеяси учта янги халқаро кунни жорий этди.
Қозоғистоннинг таклифи билан 22-апрел Халқаро сайёрани кўкаламзорлаштириш куни, Тожикистоннинг ташаббуси билан эса 31-август Халқаро хавфсиз, ҳимояланган ва ишончли сунъий интеллект куни деб белгиланди. Биринчи резолюцияни 140 давлат, иккинчисини эса 144 давлат қўллаб-қувватлади; АҚШ ҳар иккисига ҳам қарши овоз берди.
Бундан ташқари, овоз беришсиз, Сурия таклифига кўра, 19-декабр Бедарак йўқолганларни излаш билан шуғулланувчи аёллар хизматларини эътироф этиш халқаро куни сифатида таъсис этилди.
Айрим мамлакатлар янги саналарни олқишлаган бўлса-да, Канада, Янги Зеландия, Австралия, Аргентина ва Мексика бундай кунлар сонининг кўпайиб бораётгани, уларнинг бир-бирини такрорлаш эҳтимоли ва БМТга қўшимча юклама тушишидан хавотир билдирди. АҚШ вакили ҳам ушбу ташаббусларни танқид қилиб, янги халқаро кунларни "исрофгарчилик" деб атади.
БМТ Бош Ассамблеяси томонидан доимий равишда тўлдириб бориладиган халқаро кунлар рўйхати ҳозирда 111 тага етди. Бу кунлар БМТ Бош Ассамблеяси қарорлари билан муҳим тарихий воқеалар ва инсон ҳаётининг муҳим жиҳатларини таъкидлаш мақсадида таъсис этилади. Аъзо давлатлар кунни эълон қилиш ташаббуси билан чиқиши мумкин, резолюция эса консенсус асосида қабул қилинади. Шу сабабли рўйхатга деярли ҳар йили янги саналар қўшилади.