BMB HOLDING Испания компаниялари билан агросаноат лойиҳаларини муҳокама қилди

**BMB HOLDING Испания компаниялари билан агросаноат лойиҳаларини муҳокама қилди**

BMB HOLDING 29–31 октябрь кунлари Тошкентда бўлиб ўтган Ўзбекистон — Испания бизнес-форуми доирасида Испания компаниялари билан қишлоқ хўжалиги ва агросаноат ишлаб чиқариши соҳасидаги ҳамкорлик имкониятларини кўриб чиқди. Форумда Испаниянинг 20 га яқин компанияси вакиллари иштирок этди.

Тадбир савдо-иқтисодий алоқаларни ривожлантириш, аграр секторга инвестицияларни жалб қилиш, замонавий технологияларни жорий этиш ва қўшма лойиҳаларни тайёрлашга бағишланди.

Бизнес-дастур давомида Ўзбекистон қишлоқ хўжалигининг ҳолати ва соҳанинг долзарб вазифалари муҳокама қилинди. Минерал ва органик ўғитлар ишлаб чиқариш, тупроқ унумдорлигини ошириш, уларни дезинфекция қилиш воситаларини ишлаб чиқиш ҳамда илғор агротехнологияларни жорий этиш ҳамкорликнинг истиқболли йўналишлари сифатида белгиланди.

Форумда БМБ ҲОЛДИНГ номидан департамент директори Бобир Яҳяев иштирок этди. У Агро-Индустриал Гроуп, Индустриас Давид С.Л.У., Пол. Инд. Лос Паломарес, Виверос Верон, ПСБ Продуссион Вегетал, Агромиллора Фидан Уретим ве Паз Лтд. ва Армандо Алварез Гроуп вакиллари билан музокаралар ўтказди.

Бундан ташқари, Испаниянинг Москва ва Тошкентдаги Элчихонаси Иқтисодий ва савдо бўлимининг иқтисодий ва савдо масалалари бўйича маслаҳатчиси Хесус Варела билан учрашув бўлиб ўтди.

Томонлар Испания компаниялари фаолиятининг йўналишлари, уларнинг ишлаб чиқариш тажрибаси ва қўлланиладиган технологиялари, шунингдек, Ўзбекистон бозорига чиқиш ва ҳамкорликдаги ишларни ташкил этиш имкониятларини муҳокама қилдилар. Испания бизнеси вакилларига BMB HOLDING фаолияти, холдингнинг инвестицион ва ишлаб чиқариш салоҳияти ҳамда унинг истиқболли лойиҳалари ҳақида маълумот берилди.

Музокараларнинг асосий мавзулари қаторидан қишлоқ хўжалиги техникаси, замонавий агротехнологиялар, кўчатчилик, ўсимликшунослик ва агросаноат ишлаб чиқариши ўрин олди. Иштирокчилар, шунингдек, хорижий технологияларни Ўзбекистон шароитига мослаштириш ва қўшма ташаббусларни ишлаб чиқиш имкониятини ҳам кўриб чиқдилар.

Аниқ келишувлар, инвестициялар ҳажми ва лойиҳаларни амалга ошириш муддатлари ҳақидаги маълумотлар келтирилмаган.