Блогерлар факултети аллақачон мавжуд: АҚШ университетлари инфлуенсерларни тайёрлашни бошлади

Блогерлар факултети энди ҳақиқатга айланди: АҚШ университетлари инфлуенсерларни тайёрлашни бошлади.

Аризона Давлат Университети (АСУ) Уолтер Кронкайт номидаги Журналистика ва Оммавий Коммуникациялар Мактаби негизида “Контент яратиш” йўналиши бўйича бакалавриат дастурини ишга туширди. 2026-йил март ойида АСУ университети сенати томонидан тасдиқланган ушбу тўрт йиллик дастур талабаларни анъанавий журналистикага эмас, балки креатив иқтисодиётда инфлуенсер ва стратегик ҳикоячилар сифатида фаолият юритишга тайёрлайди.

Дастур контентни режалаштириш, видео ва подкастлар продюсерлиги, шахсий брендинг ва ижтимоий тармоқлар стратегияси бўйича курсларни ўз ичига олади. Ўқитиладиган фанлар орасида “Қандай қилиб инфлуенсер бўлиш мумкин?”, “Камера қаршисида ишлаш” ҳамда “Подкастинг ва аудиоҳикоячилик” каби курслар мавжуд. Талабалар амалиётни Лос-Анжелесдаги университетнинг ўз контент студиясида, шунингдек, халқаро сафарлар давомида ўтайдилар.

Дастурнинг ўқув симуляцияларидан асосий фарқи битирувга қўйиладиган мажбурий талабдир: талаба шунчаки имтиҳон топшириш билан чекланмай, танланган платформада, масалан, ТикТокъда аудиторияни амалда кенгайтириши ва қамровнинг сезиларли даражада ошганини кўрсатиб бериши лозим.

Кронкайт мактабининг декани Жессика Пуччи шундай дейди: “Улар ўзлари танлаган платформа, реал контент, жонли обуначилар ва ҳақиқий аудиторияга эга бўлиб битирадилар”.

АСУ рақамли контент билан ишлаш бўйича диплом таклиф қилган биринчи ОТМ бўлмаса-да, ушбу дастурни алоҳида тажриба курси сифатида расмийлаштирмай, мамлакатнинг энг йирик ва нуфузли журналистика факултетларидан бирига татбиқ этгани билан ажралиб туради.

Сўнгги йилларда блогерлар ва инфлуенсерлар индустрияси продюсер ва монтажчилардан тортиб, бренд келишувлари бўйича менежерларгача бўлган ўзининг касбларига эга тўлақонли креатив иқтисодиётга айланди. Давлат университетида махсус дипломнинг жорий этилиши меҳнат бозори инфлуенс-маркетингни қўшимча машғулот эмас, балки мустақил карьера йўли сифатида қабул қилишга тайёр эканидан далолат беради.