Бия юради, қачондир етиб боради
Ўзбекистон ва ИИ Транскаспий йўлагига инвестициялар ва чегара тартиб-таомилларини соддалаштиришни муҳокама қилади
Ўзбекистон ва Европа Иттифоқи 30 сентябрь куни Тошкентда Транскаспий транспорт йўлаги бўйича иккинчи миллий конференцияни ўтказади. Учрашувда темир ва автомобиль йўлларига инвестициялар киритиш, логистикани ривожлантириш ва хусусий бизнесни жалб этиш масалалари муҳокама қилинади. Бу ҳақда ЕИнинг Ўзбекистондаги Делегацияси матбуот хизмати хабар берди.
Конференция ташкилотчилари сифатида Ўзбекистон Транспорт вазирлиги ва Европа комиссиясининг Халқаро ҳамкорлик бўйича бош директорияти иштирок этади. Тадбирда давлат органлари, халқаро молия институтлари, транспорт ва логистика компаниялари вакиллари қатнашади.
Иштирокчилар Марказий Осиё ва Европа ўртасидаги йўналишда Ўзбекистон учун устувор бўлган лойиҳаларни кўриб чиқадилар. Йўлларни ривожлантириш ва чегара тартиб-таомилларидан ташқари, кун тартибига логистика тармоғи, савдо ва транспорт ҳужжатларини рақамли форматга ўтказиш ҳамда хусусий бизнесни жалб қилиш масалалари киритилган.
Конференция ЕИ томонидан Global Gateway стратегияси доирасида молиялаштириладиган Транскаспий транспорт йўлаги Мувофиқлаштирувчи платформаси доирасида бўлиб ўтади. Платформа йўналишдаги инвестициялар ва ислоҳотларни мувофиқлаштириш учун Марказий Осиёнинг бешта давлати, Европа Иттифоқи, халқаро молия институтлари ва бошқа ҳамкорларни бирлаштиради.