Бирлашиб буюк тарих яратамиз: «Маърифат карвони» зиёлиларни умуммиллий ҳаракатга сафарбар этмоқда
«Маърифат карвони» лойиҳаси «Бирлашиб, буюк тарих яратамиз» шиорига мувофиқ, Президент Шавкат Мирзиёевнинг мустақиллик йиллигига бағишланган
Бирлашиб буюк тарих яратамиз: «Маърифат карвони» зиёлиларни умуммиллий ҳаракатга сафарбар этмоқда
«Маърифат карвони» лойиҳаси «Бирлашиб, буюк тарих яратамиз» шиорига уйғун равишда, Президент Шавкат Мирзиёевнинг мустақиллик йиллигига бағишланган ғояларини жамиятга етказишга йўналтирилган. Лойиҳа 4 сентябр куни 40 нафар тарғиботчи учун ўтказилган машғулотдан кейин 7–9 сентябр кунлари Қорақалпоғистон, Андижон, Самарқанд, Навоий, Фарғона, Наманган, Бухоро ва Хоразм вилоятларида давом этди. Ушбу илмий-маърифий учрашувларда 8 ҳудуддан жами 2089 нафар иштирокчи қатнашди.
Буюк ўзгаришлар энг аввало инсон тафаккурида бошланади. Янги фикр пайдо бўлади, савол туғилади, мулоқот юзага келади. Энг муҳими, ана шу фикр ва ташаббуслар ҳаракатга айланади. Бугун юртимизда “Бирлашиб, буюк тарих яратамиз” шиори остида ўтаётган илмий-маърифий тадбирлар айнан шу жараённинг амалий кўринишига айланмоқда.
“Маърифат карвони” бир ҳудуддан бошқасига нафақат ғоя, балки мулоқот, мушоҳада ва ташаббус руҳини ҳам олиб бормоқда. Унинг асосий мақсади — Президент Шавкат Мирзиёевнинг мамлакатимиз мустақиллигининг 35 йиллигига бағишланган тантанали маросимда илгари сурган ғоя ва ташаббусларини халқимизга содда, аниқ ва ҳаётий мисоллар орқали етказиш, уларни амалий ҳаракатга айлантиришдир.
Республика Маънавият ва маърифат маркази, Олий Мажлис ҳузуридаги жамоат фонди, “Маърифат” тарғиботчилар жамияти, Ижтимоий-маънавий тадқиқотлар институти ва бошқа ташкилотлар билан ҳамкорликда амалга оширилаётган ушбу “Маърифат карвони” оддий тарғибот эмас. Чунки бу жараёнда инсон фақат тингловчи бўлиб қолмайди, балки фикр билдирувчи, савол берувчи ва ташаббус кўрсатувчи иштирокчига айланади.
Ҳар бир учрашувда янги фикр туғилади. Янги фикр эса янги ҳаракат учун замин яратади. Шу маънода, карвоннинг ҳар бир манзили ўзига хос маърифий майдондир. Бу ерда давлат хизматчиси билан нуроний, ёшлар етакчиси билан хотин-қизлар фаоли, тарғиботчи билан жамоатчилик вакили бир мақсад атрофида мулоқот қилади. Мақсад эса битта — юрт тараққиётига дахлдорлик ҳиссини кучайтириш.
Катта ҳаракат кичик, аммо муҳим қадамдан бошланди.
4 сентябр куни Республика Маънавият ва маърифат марказида 40 нафар республика тарғиботчиси учун семинар-тренинг ташкил этилди. Уларга ҳудудлар, вазирлик ва идораларда маърифий тадбирларни самарали ташкил этишнинг замонавий усуллари бўйича методик тавсиялар берилди. Ссенарийлар, видеоматериаллар, тақдимотлар ва маъруза матнлари тақдим этилди. Энди бу билим ва тажриба ҳудудларга етказилмоқда. Яъни 40 нафар тарғиботчи — 40 та манзил эмас. Улар ортида минглаб учрашувлар, минглаб мулоқотлар ва янги ташаббуслар турибди. Бир фикрнинг кўпайиши — унинг кучга айланганидир.
7–9 сентябр кунлари Қорақалпоғистон Республикаси ҳамда Андижон, Самарқанд, Навоий, Фарғона, Наманган, Бухоро ва Хоразм вилоятларида семинар-тренинглар ва илмий-маърифий учрашувлар ўтказилди. Тадбирларда Қорақалпоғистондан 440, Самарқанддан 190, Андижондан 100, Навоийдан 150, Фарғонадан 220, Намангандан 264, Бухородан 225 ва Хоразмдан 500 нафар иштирокчи қатнашди. Жами — 2089 нафар. Бир қарашда бу шунчаки рақам. Аммо ҳар бир рақам ортида инсон бор. Унинг саволи, фикри, ҳаётий тажрибаси, таклифи ва келажак ҳақидаги қарашлари бор. Шу боис “Маърифат карвони”нинг энг катта натижасини рақамларда эмас, одамларнинг фикрида кўриш мумкин.
Маърифат — фақат билим бериш эмас. У инсонни ўйлашга, изланишга ва ҳаракат қилишга ундайди. Шунинг учун семинарларда давлат хизматчилари, нуронийлар, хотин-қизлар фаоллари, ёшлар етакчилари ва маърифат тарғиботчиларининг иштирок этаётгани бежиз эмас. Уларнинг ҳар бири ўз жамоасига, ўз маҳалласига, ўз ҳудудига янги фикр олиб боради.
Бир инсонда уйғонган фикр бир жамоани ҳаракатга келтириши мумкин. Бир жамоанинг ҳаракати эса бутун ҳудудда ижтимоий муҳитни ўзгартириши мумкин.
“Маърифат карвони”нинг йўли ҳали узоқ. У бир ҳудуддан бошқасига, бир жамоадан бошқасига эзгу ғояларни олиб боради. Ҳар бир учрашувда саволлар туғилади, фикрлар тўқнашади, янги ташаббуслар пайдо бўлади. Аслида, карвоннинг энг муҳим манзили муайян бино ёки ҳудуд эмас. Унинг энг муҳим манзили — инсон қалби ва тафаккури. Чунки тафаккур ўзгарса, муносабат ўзгаради. Муносабат ўзгарса, ҳаракат пайдо бўлади. Ҳаракат эса натижа яратади.
Бугун “Маърифат карвони” атрофида бирлашаётган минглаб инсонларнинг мақсади муштарак: ислоҳотларнинг мазмун-моҳиятини чуқур англаш, юрт тақдирига дахлдорликни ҳис этиш ва тараққиётга ўз ҳиссасини қўшиш. Зеро, буюк тарихни фақат тарихчилар ёзмайди. Уни ўз даврида масъулиятни ҳис қилган, билимга интилган, эзгу мақсад атрофида бирлашган инсонлар яратади.
Бугунги янги фикр — эртанги янги ҳаракат. Бугунги янги ҳаракат эса келажакнинг буюк тарихига айланади. Янги фикр — янги ҳаракат — янги натижа.