Биринчи жаҳон урушининг сўнгги ҳафтасида ҳалок бўлган қаҳрамоннинг медали 130 минг фунт стерлингга сотилди
Жеймс Кирк низонинг сўнгги кунларида сафдошларини ҳимоя қилиш чоғида ҳалок бўлган, дейди аукциончилар.
**Биринчи жаҳон урушининг сўнгги ҳафтасида берилган қаҳрамонлик медали 130 минг фунт стерлингга сотилди**
Иккинчи лейтенант Жеймс Кирк Биринчи жаҳон урушининг сўнгги ҳафтасида ҳалок бўлган эди
Биринчи жаҳон урушининг сўнгги ҳафтасида ҳалок бўлган аскарга берилган Виктория хочи медали 130 000 фунт стерлингга сотилди.
Чидл Хьюмлик Жеймс Кирк 1918 йил ноябрь ойида Францияда кўприк қураётган аскарларни ҳимоя қилиш пайтида кучли пулемёт ўқи остида ҳалок бўлган.
21 ёшли иккинчи лейтенант юзидан ўқ еганидан кейин ҳам, немис пулемётчиларига қарши ёлғиз ўзи курашиш учун канал орқали сузиб ўтиб, жангни давом эттирган.
Лондондаги Noonans аукцион уйи медални 7 октябрь куни сотди. У 100 000 дан 160 000 фунт стерлинггача баҳоланган эди.
Noonans вакилларининг сўзларига кўра, Кирк 1918 йил 4 ноябрдаги Самбр жанги пайтида Уаза канали устидан кўприк қуришга ҳаракат қилаётган Қироллик муҳандисларини ҳимоя қилишда "энг олий қурбонлик"ни келтирган.
Кирк Льюис пулемёти ва тўртта ўқдонни олиб, бензин канистралари ва пўкак қалқиб чиқувчи мосламалардан ясалган солда "энг шиддатли пулемёт ўқлари остида" сув йўлини сузиб ўтган, дейди Noonans.
Жеймс Кирк кўрсатган жасорати учун Виктория хочи билан тақдирланган
Аукциончилар қўшимча қилди: "Қирғоқ пулемётлар билан тўла эди.
У Льюис пулемётини 10 ярд (тахминан 9 метр) масофада ўрнатди ва барча ўқ-дориларини узиб тугатди.
Қўшимча ўқ-дорилар унга солда сузиб етказилди ва у Қироллик муҳандисларини ўз вазифасини бажаришида ҳимоя қилиб, отишмани давом эттирди.
У қўлидан ва юзидан яраланган бўлса-да, энг очиқ позициядан туриб, бошидан ўқ еб, пулемёти устига жонсиз йиқилгунга қадар тўхтовсиз ўқ узди".
Савдодан сўнг, Noonans мижозлар билан алоқалар бўлими раҳбари Кристофер Меллор-Хилл шундай деди: "Ушбу мукофот Британия жасорат мукофотларининг янги коллекциясидан жой олганини кўришдан жуда хурсандман".
Киркнинг вафотидан кейин берилган Виктория хочи унинг урушдаги хизматлари учун берилган бошқа учта медали билан бирга сотилди.
У машҳур уруш шоири Уилфред Оуэн билан бир жангнинг ўзида ҳалок бўлган
Биринчи жаҳон уруши пайтида 17 миллион аскар ва тинч аҳоли ҳалок бўлган