«BioPharma City» Жанубий Корея кластерлари билан ҳамкорликни йўлга қўймоқда
Ўзбекистон ва Жанубий Корея қўшма тадқиқотлар, технологиялар трансфери ҳамда фармацевтика ва биотехнология инфратузилмасини ривожлантиришни муҳокама қилдилар.
«BioPharma City» Жанубий Корея кластерлари билан ҳамкорликни йўлга қўймоқда
Ўзбекистон Тиббий-фармацевтика тармоғини ривожлантириш агентлиги вакиллари Жанубий Кореянинг етакчи тиббий-фармацевтика кластерлари билан ҳамкорлик истиқболларини муҳокама қилдилар.
Музокаралар 3 сентябрь куни Ўзбекистон делегациясининг Корея Республикасига хизмат сафари доирасида бўлиб ўтди.
Ўзбекистон томони Осонг Адвансед Медисал Индустрй Промотион Фоундатион базасида фаолият юритувчи КБИО Ҳеалтҳ, шунингдек, К-МЕДИ ҳуб — Даегу Гьеонгбук Медисал Инноватион Фоундатион вакиллари билан учрашувлар ўтказди.
Музокаралар давомида иштирокчилар Корея кластерларининг инфратузилмаси, жумладан, замонавий фармацевтика ва биотехнология майдончалари, илмий-тадқиқот лабораториялари ҳамда инновацион ишлаб чиқариш объектлари билан танишдилар.
Асосий масалалардан бири Ўзбекистоннинг «BioPharma City» ва Корея тиббий-фармацевтика кластерлари ўртасида тўғридан-тўғри cluster-to-cluster ҳамкорлигини йўлга қўйиш бўлди. Томонлар R&D-инфратузилмани биргаликда ривожлантириш, лабораториялар ва виварийлар фаолиятини такомиллаштириш, мутахассислар тайёрлаш ва кадрлар алмашинувини кенгайтириш имкониятларини кўриб чиқдилар.
Биргаликдаги илмий-тадқиқот лойиҳаларига алоҳида урғу берилди. Хусусан, томонлар мРНК-вакциналарни ишлаб чиқиш, онкология соҳасидаги тадқиқотлар, дори воситаларини етказиб бериш тизимларини яратиш, доривор ўсимликлар ва биоактив бирикмаларни ўрганиш бўйича ҳамкорликни муҳокама қилдилар.
Бундан ташқари, музокаралар иштирокчилари технологиялар трансфери, шунингдек, мутахассислар учун қўшма тренинг ва семинарлар ўтказиш масалаларига тўхталиб ўтдилар.
Учрашувлар якунлари бўйича томонлар Ўзбекистон фармацевтика ва биотехнология тармоқларини янада ривожлантириш учун Кореянинг илғор тажрибасидан фойдаланишга келишиб олдилар.
Шунингдек, қўшма илмий дастурларни амалга ошириш ва «BioPharma City» ҳамда Жанубий Кореянинг тиббий-фармацевтика кластерлари ўртасида узоқ муддатли ҳамкорликни ривожлантириш режалаштирилмоқда.