Бепул автобус қатновини жорий этиш таклифи бекор қилинди
Бир йиллик бепул автобус хизмати бўйича тажриба лойиҳаси дастлаб кейинги йилги бюджетга киритилган тузатиш сифатида таклиф қилинган эди.
**Бепул автобус катновини жорий этиш таклифи бекор қилинди**
Stagecoach компаниясининг билдиришича, ҳар қандай бепул автобус қатнови етарлича сиғим мавжудлигига ишонч ҳосил қилиш учун синчковлик билан ўрганиб чиқилиши керак.
Гернсида бепул автобус қатновини йўлга қўйиш режалари кейинги йил бюджетида бошқа илгари сурилмайди, деди ушбу ғоя муаллифлари бўлган депутатлар.
Депутатлар Салли Рочестер ва Росс Ле Брун 2027 йилги бюджетга тузатиш сифатида ушбу схемани таклиф қилиб, Сиёсат ва ресурслар қўмитасидан бир йиллик синов лойиҳаси доирасида «мавжуд жамоат транспорти хизматидан» бепул фойдаланишни таъминлаш учун 1,9 миллион фунт стерлинг сўраган эдилар.
«[Оператор] Stagecoach томонидан йўловчилар сонининг ортиши айрим йўналишларда қўшимча талабни қондира олмаслик хавфини туғдириши мумкинлигидан хавотир билдирилганидан» сўнг, улар ўз таклифларини қайтариб олдилар.
Рочестернинг айтишича, у ва Ле Брун истиқболдаги режаларни кўриб чиқиш учун Атроф-муҳит ва инфратузилма қўмитаси билан ҳамкорлик қилишга содиқ қолмоқда.
У, шунингдек, автобуслар «тўла бўлган» тақдирда синов лойиҳасини амалга ошириб бўлмаслигини айтди.
BBC Radio Guernsey радиосига берган интервьюсида у шундай деди: «Ушбу тузатиш жамиятимиздаги турмуш даражаси қимматлашуви муаммоларига дуч келаётган инсонларни қўллаб-қувватлашга қаратилган эди.
Бу одамларнинг ҳаётини енгиллаштириш ва яхшилаш учун бепул автобус хизматидан фойдаланиш имкониятини берадиган транспорт стратегиясини амалга ошириш ҳақида эди.
Агар автобус хизмати имконият даражасида тўла бўлса, энди биз буни қила олмаймиз».
Унинг таъкидлашича, «мантиқий хулоса шуки, бизга кўпроқ автобуслар керак бўлади» ва қўшимча сиғимни таъминлаш учун Stagecoach шартномаси «кенгайтирилиши лозим бўлади».
Рочестер булар «биз ўрганиб чиқадиган ва умид қиламизки, келажакда яна кун тартибига қайтарадиган масалалар» эканини айтди.
Stagecoach вакилининг таъкидлашича, компания «кўпроқ одамларни жамоат транспортидан фойдаланишга ундайдиган ҳар қандай ташаббусни олқишлайди ва автобусда юришни янада қулайроқ қилишнинг афзалликларини эътироф этади».
Шу билан бирга, у «бепул автобус қатновини жорий этиш бўйича ҳар қандай таклиф, бундай схема келтириб чиқариши мумкин бўлган қўшимча йўловчилар оқимини қамраб олиш учун бутун тармоқ бўйлаб етарли сиғим мавжудлигини таъминлаш мақсадида атрофлича кўриб чиқилиши» муҳимлигини билдирди.
Компания қўшимча қилди: «Бизнинг устувор вазифамиз — автобус қатновлари, айниқса, ҳозирданоқ юқори даражадаги талабга эга бўлган йўналишларда ишончли, ҳамма учун очиқ ва барча йўловчиларнинг эҳтиёжларини қондира оладиган даражада қолишини таъминлашдир».
Ушбу таклиф сешанба куни кўриб чиқилиши кутилаётган кейинги йил бюджетига киритилган 30 та ўзгартиришдан бири эди.
Бошқа тузатишлар бюджет қисқаришига дуч келаётган Штатлар қўмиталарини молиялаштиришни таъминлашга уринишлар, ёнилғи божини музлатиб қўйиш ва хорижий ёрдам харажатларини камайтириш ҳаракатларини ўз ичига олади.