Bentley ўзининг илк тўлиқ электрли автомобилини тақдим этди
Йўлтанламаслар Крюдаги янги ишлаб чиқариш линиясида йиғилади, бу ер 1946 йилдан бери Bentley компаниясининг базаси бўлиб келган.
Bentley Чеширдаги заводини модернизация қилиш учун 350 миллион фунт стерлинг сарфлаганидан сўнг, ўзининг илк тўлиқ электрлаштирилган автомобилини тақдим этди.
Torcal йўлтанламаси (SUV) ҳашаматли автомобиллар ишлаб чиқарувчисининг 1946 йилдан бери бош қароргоҳи бўлиб хизмат қилаётган ушбу ҳудуддаги янги ишлаб чиқариш линиясида йиғилади.
Бизнес масалалари бўйича котиб Жонатан Рейнольдснинг таъкидлашича, ушбу инвестиция «Кру (Crewe) шаҳридаги 4000 та юқори даромадли маҳаллий иш ўринларини қўллаб-қувватлайди».
Бизнес, инновациялар, фан ва савдо вазирлигининг маълум қилишича, Torcal автомобилсозлик таъминот занжирини мустаҳкамлайди, чунки Bentley компаниясига 700 дан ортиқ корхона, жумладан, унинг базасидан 50 миль радиусда жойлашган 82 та корхона бутловчи қисмлар етказиб беради.
Ушбу эълон Буюк Британия автомобиль саноати жиддий қийинчиликларга дуч келаётган, хусусан, яқинда JLR йирик ҳажмдаги иш ўринларини қисқартиришини эълон қилган ва ишлаб чиқарувчилар ўз бизнесини ривожлантиришнинг янги йўлларини излаётган бир пайтда янгради.
Саноатнинг келажагини таъминлаш мақсадида янги электр моделлари эълон қилинаётган бўлса-да, тўлиқ электромобиллар келажагига ўтишни секинлаштириш бўйича чақириқлар ҳам янграмоқда.
Bentley компаниясининг билдиришича, Torcal’нинг 113 кВт/соат қувватга эга батареяси 375 милгача (600 км) масофани босиб ўтишни таъминлайди ва 400 кВт қувватли қувватлагич ёрдамида 20 дақиқадан камроқ вақт ичида 10 фоиздан 80 фоизгача қувват олиши мумкин.
Компаниянинг қўшимча қилишича, Torcal S модели соатига 162 миль максимал тезлик билан унинг ҳозиргача бўлган энг кучли автомобили, шунингдек, 0 дан 60 милгача тезликни 2,8 сонияда оладиган энг тезкор машинаси бўлади.
Стандарт Torcal модели соатига 155 миль тезликка эриша олади ва 0 дан 60 милгача тезликни 3,3 сонияда олади.
Автомобиль салонида чарм, жун ва алюминий каби материаллардан фойдаланилган.
Bentley раиси ва бош ижрочи директори доктор Франк-Штеффен Валлизер Torcal моделини «тарихдаги энг яхши Bentley’лардан бири» деб таърифлади ва у ҳашаматни электр технологияси билан бирлаштириш учун яратилганини айтди.
«Torcal — бу, энг аввало, ўз ишига бефарқ бўлмаган инсонлар томонидан қўлда яратилган, меросни илғор инновациялар билан уйғунлаштириш учун мавжуд бўлган энг яхши материаллар ва технологиялардан фойдаланилган ҳақиқий Bentley’дир», деди у.
Янги Bentley алюминий қопламага эга.
Янги ишлаб чиқариш линияси Кру ҳудудидаги 1938 йилга оид тарихий завод биноларидан бирининг ичида жойлашган.
Бир пайтлар у ерда компаниянинг механик ишлов бериш цехи, кейинчалик эса тадқиқот ва ишланмалар устахонаси жойлашган эди. Ҳозирда бино тўлиқ тозаланиб, автоном бошқариладиган транспорт воситаларига автомобилларни ишлаб чиқариш жараёни бўйлаб ҳаракатлантириш имконини берувчи янги пол билан жиҳозланди.
Рейнольдс Bentley’нинг 350 миллион фунт стерлинглик инвестициясини McLaren томонидан эълон қилинган 500 миллион фунт стерлинг ва Nissan’нинг 170 миллион фунт стерлинглик сармоясидан сўнг, Британия автомобиль саноати учун «атиги етти кун ичидаги учинчи ғалаба» деб атади.
Ҳукуматнинг маълум қилишича, у 2030 йилдан бошлаб янги бензин ва дизель двигателли автомобиллар сотувини тўхтатиш режаси билан электромобилларга ўтишни қўллаб-қувватлаш учун 7,5 миллиард фунт стерлинг сармоя киритмоқда.