Белград–Тошкент тўғридан-тўғри авиарейси 7–8 ойдан кейин очилади
Сербия Президенти Александар Вучич Белград–Тошкент тўғридан-тўғри авиарейси етти-саккиз ой ичида йўлга қўйилиши мумкинлигини маълум қилди.
Белград–Тошкент тўғридан-тўғри авиарейсини 7–8 ойдан кейин очиш режалаштирилмоқда
Белград ва Тошкент ўртасидаги мунтазам авиақатновлар яқин етти-саккиз ой ичида бошланиши мумкин. Бу ҳақда Сербия президенти Александр Вучич Белградда ўтказилган Сербия–Ўзбекистон бизнес-форумида маълум қилди.
Сербия етакчисининг сўзларига кўра, тўғридан-тўғри йўналишни йўлга қўйиш масаласи белгиланган муддатларда ҳал этилиши мумкин. Вучич кечи билан етти-саккиз ойдан кейин икки пойтахт ўртасида мунтазам рейслар бажарила бошлашига ишонч билдирди.
Сербия президенти тўғридан-тўғри авиаалоқанинг йўлга қўйилишини Ўзбекистон ва Сербиянинг янада яқинлашиши учун муҳим шарт деб атади. У янги йўналиш икки мамлакат одамлари, компаниялари ва иқтисодиётлари ўртасидаги алоқаларни ривожлантиришга хизмат қилишини таъкидлади.
Вучич, шунингдек, сайёҳлар алмашинуви ўсишини ҳам кутмоқда. Унинг сўзларига кўра, тўғридан-тўғри алоқа очилганидан кейин кўпроқ Сербия фуқаролари Ўзбекистонга, жумладан Самарқанд ва Бухорога боришлари мумкин бўлади. Шу билан бирга, у Ўзбекистондан Сербияга келувчи сайёҳлар сони ортишини ҳам кутмоқда.
Икки давлатнинг яқинлашишидаги яна бир йўналиш Ўзбекистоннинг Белграддаги дипломатик иштироки бўлади. Президент Шавкат Мирзиёев ташриф чоғида Сербия пойтахтида тўлақонли элчихона ташкил этилишини кутмасдан, алоҳида дипломатик ваколатхона очиш режалаштирилаётганини маълум қилди.
Ўзбекистон етакчисининг сўзларига кўра, келгуси ҳафтадаёқ Белградга дипломатлар етиб келиши керак. Улар Сербия компанияларига ўзбекистонлик ҳамкорлар билан ишбилармонлик алоқаларини ўрнатиш ва ривожлантиришда кўмаклашади.
Мирзиёевнинг Сербияга ташрифи икки томонлама муносабатлар тарихида Ўзбекистон президентининг ушбу мамлакатга илк ташрифи бўлди. Музокаралар якунида томонлар стратегик шериклик муносабатлари ўрнатилганини эълон қилишди.