Беларусда ўзбекистонликлар учун 800 га яқин иш ўрни таклиф этилмоқда
Беларусда ўзбекистонликлар учун қарийб 800 та иш ўрни таклиф қилинмоқда
Ўзбекистон Миграция агентлиги директори Муҳсинхўжа Абдураҳмонов Беларуснинг Ўзбекистондаги элчиси Александр Огородников билан учрашув ўтказди. Унда ўзбекистонликларни, айниқса Андижон вилояти фуқароларини Беларуснинг Витебск вилоятига ташкилий тартибда ишга жойлаштириш масалалари муҳокама қилинди.
Маълумотга кўра, Витебск вилоятидаги иш берувчилар қарийб 800 нафар ходимга эҳтиёж билдирган. Андижон вилоятидан тақдим этилган номзодлар ҳужжатлари текширилгач, ҳозиргача 204 кишидан иборат рўйхат шакллантирилган. Келгусида танловга Ўзбекистоннинг барча ҳудудларидан талабгорларни жалб қилиш режалаштирилмоқда.
Номзодларнинг ҳужжатлари ва касбий кўникмалари дастлабки босқичда кўриб чиқилади. Якуний танлов эса Беларус иш берувчилари билан онлайн суҳбатлар орқали амалга оширилади.
Учрашувда фуқароларнинг йўл харажатларини иш берувчилар томонидан олдиндан қоплаш имкониятини ҳам ўрганиш таклиф этилди.
15-июл куни Шавкат Мирзиёев Беларусга ташрифи давомида эришилган келишувлар ижроси бўйича тақдимот билан танишганди. Унда ҳудудлараро ҳамкорликни кенгайтириш, янги инвестиция лойиҳаларини амалга ошириш ва фуқароларни иш билан таъминлаш масалалари муҳокама қилинган.
Тақдимотда Андижон ва Витебск вилоятлари ўртасидаги ҳамкорлик натижалари ҳам кўриб чиқилган. Маълум қилинишича, икки ҳудуд ўртасидаги “йўл харитаси” доирасида 255 нафар андижонликнинг Витебск вилоятига ташкилий асосда бориши ва иш билан таъминланиши йўлга қўйилган.