Беларус Россия дронларига ёрдам берувчи ретрансляторларини яна ёқди — Украина

Беларус Россия дронларига ёрдам берувчи ретрансляторларини яна ишга туширди — Украина

Беларус Россия дронларига нишонларни аниқлашда кўмаклашадиган ретрансляторларини қайта ёқди. Бу ҳақда Украина Давлат чегара хизмати вакили Андрей Демченко маълум қилди.

Ҳозирда Беларус Украина ҳудудини ўққа тутишда Россияга фаол ёрдам бермоқда. Беларус ҳудудида ишга тушириладиган ва Россиянинг “Шаҳед” ҳамда “Гербер” дронлари учун сигнал таъминлайдиган ретрансляторлар ҳам шулар жумласидан, деди Демченко.

У Россиядан учиб келаётган дронлар сигнал олиш ва Украина ҳудудига янада чуқурроқ кириб бориш учун Беларус чегарасига яқин жойлаштирилганини таъкидлади.

Демченко сўзларига кўра, ретрансляторларнинг ишлаши 13-сентябрга ўтар кечаси Полша билан чегарадаги “Ягодин” назорат-ўтказиш пунктига ҳужум уюштириш имконини ҳам берган.

Ўша куни Россия қўшинлари Киев—Варшава йўналишида кетаётган поездга ҳам зарба берган. Ҳужумга учраган поезд яқинида европалик дипломатларни олиб кетаётган махсус поезд бўлган. Украина президенти Владимир Зеленский Россия поезд йўловчилари таркибидан хабардор бўлганини билдирган.

Маълумот учун, Зеленский июн ойи ўрталарида Беларус президенти Александр Лукашенкодан Украина билан чегарадаги ретрансляторларни ўчириб қўйишни талаб қилганди. “Агар у бундай қилмаса, биз қиламиз”, деган эди ўшанда Украина раҳбари. Ушбу таҳдиддан бир ҳафта ўтиб, Зеленский чегарадаги ретрансляторлар фаолияти тўхтаганини айтганди.

Ретранслятор — радио сигналини қабул қилиб, уни кучайтирган ҳолда ёки бошқа частотада қайта узатувчи қурилма. У радиоалоқанинг қамров ҳудудини кенгайтиришга имкон беради. Айниқса, рельефи мураккаб ҳудудларда ёки стансиялар ўртасида тўғридан тўғри алоқа ўрнатишнинг имкони бўлмаган ҳолатларда қўлланади.