«Бэкпэк» (Рюкзак) Аляскадаги «Семиз айиқ ҳафталиги» (Fat Bear Week) ғолиби деб эълон қилинди

«Бэкпэк» (Рюкзак) Аляскадаги «Семиз айиқ ҳафталиги» ғолиби деб топилди

89 Бэкпэк лақабли қўнғир айиқ АҚШ Миллий боғлар хизмати «ўлчам, маҳорат, егулик топиш ва стратегик дангасалик жанги» деб атаган мусобақадан сўнг ҳар йиллик «Семиз айиқ ҳафталиги» унвонини қўлга киритди.

Аляскадаги Катмай миллий боғи томонидан ташкил этилган танловнинг финал босқичида Бэкпэкнинг гавдаси 910 рақами билан танилган айиқдан устун келди ва у 103 344 овоз тўплади, 910 эса 98 253 овоз олди.

Миллий боғлар хизмати бу йил ўн учинчи бор ўтказилаётган танловда «ихтиёрсиз равишда иштирок этган» 16 та айиққа миннатдорчилик билдирди.

Мухлисларидан бири «ҳам йўғон, ҳам орқаси баҳайбат» деб таърифлаган Бэкпэк тез орада олти ойгача давом этиши мумкин бўлган қишки уйқуга кетади.

Унинг онаси Холли 2019 йилда «Семиз айиқ ҳафталиги»да ғолиб чиққан эди. Бэкпэкнинг лақаби бошқа бир мухлиси айтганидек танасининг «лампачкасимон шакли»дан эмас, балки у болалигида онаси Холли боғнинг лосось балиқларига бой Брукс дарёсидан ўтаётганда унинг орқасига чиқиб олиш одатидан келиб чиққан.

Яна бир ишқибоз уни «катта юнгливой» деб атади.

Бироқ Бэкпэкнинг танқидчилари ҳам бор эди. Бир аёлнинг фикрича, ўз боласини ҳам, асраб олган жиянини ҳам тарбиялаган урғочи 910-айиқ «ҳар томонлама йирикроқ айиқ. Бэкпэкнинг шунчаки орқаси каттароқ».

«Менга 910 бу йил ҳақиқатан ҳам қаттиқ меҳнат қилгандек туюлди», деб ёзди 910 нинг бошқа бир тарафдори боғнинг Facebook саҳифасида, яна бир овоз берувчи эса: «У думалоқ, у семиз, менинг севимли 910-айиғим овоз олди», деб изоҳ қолдирди.

Финалчиларнинг энг сўнгги вазни ҳали эълон қилинмаган. Вояга етган эркак қўнғир айиқлар ёз ўрталарида ўртача 408 кг гача тош босади ва кузга келиб кўпинча ўз вазнининг 25 фоизига тенг вазн йиғади. Энг йирик эркак айиқларнинг вазни 540 кг дан ошиши мумкин.

Урғочилари кичикроқ бўлса-да, вазни 300 кг дан ошиши мумкин. Айиқ болалари тахминан ярим килограмм вазн билан туғилади.

«Қишки уйқу пайтида айиқлар емайди ва ичмайди ҳамда тана вазнининг учдан бир қисмини йўқотади. Уларнинг қишдан омон чиқиши инга киришдан олдин етарлича ёғ захирасини тўплашига боғлиқ», деб ёзади ташкилотчилар.

Июндан октябрь ойининг ўрталаригача айиқлар жағлари ёки панжалари билан тутган лосось балиқларини ўз ичига олган озуқалар билан озиқланади.

Бэкпэкнинг таржимаи ҳолида айтилишича, унинг «вазмин қатъияти унга Брукс дарёсидаги энг йирик айиқлар орасида ўз ўрнини топишга имкон берган».

Ўтган йили танловнинг оғир вазнли чемпионини аниқлаш учун 100 дан ортиқ мамлакатдан 1,7 миллиондан ортиқ овоз берилган эди.