Беҳруз Каримов «Лугано» билан 5 йиллик шартнома имзолади
Ўзбекистон миллий жамоасининг жаҳон чемпионатида энг ёрқин ўйин кўрсатган футболчиларидан бири, 19 ёшли Беҳруз Каримов 2031-йилгача Швейсариянинг «Лугано» клуби шарафини ҳимоя қилади.
Беҳруз Каримов «Лугано» билан 5 йиллик шартнома тузди
Жаҳон чемпионатида Ўзбекистон миллий терма жамоасининг энг ёрқин футболчиларидан бири бўлган 19 ёшли Беҳруз Каримов «Сурхон» жамоасини тарк этиб, Швейсариянинг «Лугано» клубига ўтди.
Ҳимоячи 5 йиллик шартномага имзо чекди. Шартнома шартлари ошкор этилмаган.
Беҳруз Каримов 2007-йил 7-августда туғилган. У дастлаб Одил Жуниор академиясида таҳсил олган, кейинроқ Тошкентнинг «Олимпик» клубига ўтган. 2025-йил февралидан бери Термизнинг «Сурхон» клубида ўйнаб келаётган эди.
1908-йилда ўз номидаги шаҳарда ташкил этилган «Лугано» клуби Швейсариянинг энг қадимий клубларидан бири ҳисобланади. У уч марта мамлакат чемпиони ва тўрт марта Швейсария кубоги соҳиби бўлган.
Ўтган мавсумда клуб ички чемпионатда 3-ўринни эгаллаб, УЕФА Конференсиялар лигасида (Чемпионлар лигаси ва Европа лигасидан кейинги мусобақа) иштирок этиш ҳуқуқини қўлга киритди.
Жорий Конференсиялар лигаси мавсумида клуб 3-саралаш босқичининг дастлабки ўйинида Фарер оролларининг «Рунавик» клубини ўз майдонида 2:0 ҳисобида мағлуб этди. Жавоб ўйини 13-август куни бўлиб ўтади. Агар «Лугано» бу босқичдан ўца, гуруҳ босқичига чиқиш учун «Маккаби Т-А» (Исроил) ва ССКА (Болгария) ўйини ғолиби билан куч синашади.