“Бавария” Ҳарри Кейннинг ўрнига Эрлинг Ҳоландни олиб келмоқчи
“Бавария” Ҳарри Кейн ўрнига Эрлинг Ҳоландни олиб келишни кўзламоқда
“Бавария” келажакда ҳужум чизиғини Эрлинг Ҳоланд билан кучайтириш имкониятини кўриб чиқмоқда. Мюнхен клуби норвегиялик футболчини Ҳарри Кейннинг эҳтимолий ўрнини босиши мумкин бўлган ҳужумчи сифатида баҳоламоқда.
Ҳозирча “Бавария”нинг бош мақсади — Кейнни жамоада сақлаб қолиш. Клуб инглиз ҳужумчиси билан шартномани яна икки ёки уч йилга узайтиришни истайди. Мюнхенликлар Кейннинг янги битимга имзо чекишини кутмоқда.
Шу билан бирга, клуб Кейндан кейинги давр учун ҳам режа тузмоқда. “Бавария” трансфер бўлими ҳужум чизиғини кучайтириш учун номзодларни ўрганмоқда. Ҳоланд эса бу рўйхатдаги асосий вариантлардан бири саналади.
Бироқ “Бавария” ҳозирча Ҳоланд трансфери бўйича музокара олиб бораётгани йўқ. Клуб норвегиялик ҳужумчининг келажакдаги режаларини ҳам инобатга олиши керак.
Ҳоланд фаолиятининг кейинги босқичида Испанияда ўйнаш истагини яширмаган. Унинг трансфери борасида “Барселона” ва “Реал Мадрид” ҳам эҳтимолий даъвогарлар сифатида тилга олинмоқда.
ТЕАМталк маълумотига кўра, “Барселона” ва “Реал Мадрид” 2027-йилда Ҳоландни “Манчестер Сити”дан олиб кетиш имкониятини кўриб чиқмоқда. Бироқ бундай трансфер футболчининг ўша пайтда Англияни тарк этиш ҳақидаги қарорига боғлиқ бўлади.
Ҳоланд Германия футболига бегона эмас. У “Манчестер Сити”га ўтишидан аввал Дортмунднинг “Боруссия” клубида бир неча йил ўйнаган. Шунга қарамай, унинг Бундеслигага қайтиш истаги бор-йўқлиги ҳозирча номаълум.
“Бавария” эса вазиятни кузатишда давом этмоқда. Клуб учун ҳозирги асосий вазифа — Кейн билан янги шартнома имзолаш. Агар инглиз ҳужумчиси келажакда Мюнхенни тарк эца, унинг ўрнини ким эгаллаши масаласи кун тартибига чиқади.
Шу сабабли Ҳоланднинг “Бавария”га ўтиши ҳозирча яқин трансфер сифатида кўрилмаяпти. Мюнхен клуби аввало Кейнни сақлаб қолишни истамоқда. Ҳоланднинг эҳтимолий трансфери эса Кейннинг “Бавария”даги фаолияти қачон якунланиши ва норвегиялик футболчининг ўша пайтдаги режаларига боғлиқ.
Маълумот учун, 33 ёшли Ҳарри Кейн ўтган мавсум барча мусобақаларда 61 та баҳсда майдонга тушиб, 73 та гол ва 8 та голли узатмага муаллифлик қилган. Шунингдек, Кейн Европа лигаларининг энг яхши тўпурари сифатида “Олтин буца”ни ҳам қўлга киритди. Унинг мюнхенликлар билан амалдаги шартномаси 2027-йил ёзига мўлжалланган. Трансфермаркт порталига кўра унинг ҳозирги бозор қиймати 60 миллион еврога баҳоланмоқда.