«Бавария» «Арсенал»ни енголмади, «Реал»да йирик ғалаба
Чоршанба оқшомида ЕЧЛнинг 3-тури доирасида ўтказилган ўйинлар, голлар ва турнир жадвалидаги вазият.
«Бавария» «Арсенал»ни енга олмади, «Реал» эса йирик ғалабага эришди
«Бавария» – «Арсенал» 2:2
Голлар:
Эзе, 25 (0:1). Дейвис, 35 (1:1). Кейн, 61 – пеналти (2:1). Райс, 82 (2:2)
«Бавария»: Ноер, Упамекано, Ким Мин Же (Та, 46), Станишич, Лаймер, Бишоф, Павлович, Сайбари (Карл, 68), Дейвис (Браун, 85), Гнабри (Диас, 68, Сапоко Ндиай, 90), Кейн
«Арсенал»: Райя, Габриел Магаляйш, Конса, Калафиори, Тимбер, Гимарайш (Люис-Скелли, 69), Райс, Эдегор (Мерино, 85), Мадуеке, Сака (Эзе, 10), Ҳаверс (Ёкереш, 68)
Венсан Компани кутилмаганда анча эҳтиёткор тактика танлади: Луис Диасни захирада қолдириб, кўпроқ ҳимоявий вазифани бажарадиган Станишични майдонга туширди. «Бавария» олдинги чизиқда юқори прессингдан воз кечиб, қарши ҳужумларга таянишни маъқул кўрди.
Лондонликлар учрашув бошидаёқ ҳужумдаги асосий футболчиларидан бири Букаё Сакани йўқотди. Ўнг қанот вингери жароҳатни майдонда олди — ўйиндан кейинги хабарларга кўра, футболчи декабргача сафга қайтмаслиги мумкин.
Артета Саканинг ўрнига Эберечи Эзени туширди ва айнан у 25-дақиқада «Арсенал»ни ҳисобда олдинга олиб чиқди. Мартин Эдегор майдоннинг иккинчи қисмидан туриб тўпни ҳимоячилар ортига узатди, Эзе офсайд чизиғида ҳаракат қилиб бу пасга етиб борди ва Мануел Ноерни бемалол доғда қолдирди.
10 дақиқа ўтгач, «Бавария» жавоб қайтарди. Бутун ўйин давомида орқароқда ўйнаган Ҳарри Кейн ҳам Эдегорникига ўхшаш идеал пас берди. Ҳимоя чизиғини ёриб ўтган тўпга Алфонсо Девис етиб борди ва Давид Райяга ҳеч қандай имкон қолдирмади.
Иккинчи бўлимда мезбонлар ҳужумкор футболга ўтиб, рақибни жарима майдонига қамаб қўя бошлади. Бу ўз самарасини берди: Кейннинг зарбасидан сўнг тўп йўлини тўсишга уринган Юрриен Тимбернинг қўли ҳавода қолиб кетди ва пеналти белгиланди. Ҳарри 11 метрлик нуқтадан аниқ зарба берди — 2:1.
Мюнхенликлар шундан кейин ҳам ҳужум қилишда давом этди, бироқ иккинчи бўлимнинг иккинчи ярмида чарчаб қолди. Шундан сўнг «Арсенал» ўйин назоратини қўлга олди, Артетанинг алмаштиришлари бу сафар ҳам ўзини оқлади ва ҳисоб тенглашди. Меҳмонлар бир неча дақиқа давомида рақибга нафас ростлаш имконини бермади ва бу босим Райснинг ҳисобни тенглаштириши билан якунланди — 2:2.