«Барселона» Левандовскини клуб афсоналари рўйхатига киритди
Полшалик футболчи «Барселона» сафидаги 193 та ўйинда 120 та гол уриб, уч марта Испания чемпионлигини қўлга киритган.
«Барселона» Левандовскини клуб афсоналари қаторига қўшди
Испаниянинг «Барселона» футбол клуби ўзининг расмий веб-сайтидаги «клуб афсоналари» бўлимига собиқ ҳужумчиси, ҳозирда МЛСънинг «Чикаго Файр» жамоасида ўйнаётган Роберт Левандовскини киритди.
37 ёшли полшалик футболчи клуб тарихида чуқур из қолдирган ўйинчилар рўйхатидан жой олди. Ушбу бўлимда Лионел Месси, Хосеп Гвардиола, Диего Марадона, Ёхан Кройфф ва «Барселона»нинг бошқа собиқ футболчилари ҳам мавжуд. Рўйхатда жами 110 та исм бор.
Левандовски Мюнхеннинг «Бавария» клубидан трансфер қилинганидан сўнг 2022-йилдан бери тўп тепиб келаётган «Барселона»ни тарк этишини эълон қилганди.
Полшалик футболчи Каталония клуби билан уч марта Испания чемпионлиги, бир марта мамлакат Кубоги ва уч марта Суперкубогини қўлга киритган. Унинг ҳисобида 193 та ўйинда урилган 120 та гол бор.
У Полша терма жамоаси сафида 167 та ўйинда 89 та гол урган (бу иккала кўрсаткич бўйича ҳам рекордчи ҳисобланади). Левандовски тўртта Европа ва иккита Жаҳон чемпионатида иштирок этган.