“Барселона” ЖЧда қизил карточкаси бекор қилинган футболчи трансфери учун курашга қўшилди
“Барселона” ЖЧда қизил карточкаси бекор қилинган футболчи трансфери учун курашга қўшилди
АҚШ терма жамоаси ва “Монако” клуби ҳужумчиси Фоларин Балогунни ўз сафига қўшиб олиш учун курашга “Астон Вилла” ва “Барселона” клублари ҳам киришди. Бу ҳақда ЛъЕқуипе нашри хабар берди.
Аввалроқ, Лондоннинг “Тоттенҳем” клуби америкалик футболчининг трансфери бўйича Франсия клуби билан музокараларни бошлагани ҳақида маълумотлар тарқалган эди.
25 ёшли Балогун ўтган мавсумда “Монако”нинг асосий ўйинчиларидан бирига айланди. У барча мусобақаларда 43 та ўйинда майдонга тушиб, 19 та гол урди. Ҳужумчи АҚШ терма жамоаси сафида ҳам ЖЧ-2026 да ўзининг яхши ўйинлари билан эътибор қозонди. Шунингдек, унинг мундиал 1/16 финалидан ўрин олган Босния ва Герсеговинага қарши баҳсда олган қизил карточкаси ва дисквалификация муддати америкалик расмийларнинг аралашуви билан бекор қилинган эди. Натижада футболчи Белгияга қарши кечган 1/8 финал (1:4) баҳсида майдонга тушган.
Ҳозирча Балогун учун асосий даъвогарлардан бири “Тоттенҳем” бўлиб турибди. Лондон клуби ҳужумчи трансфери учун қарийб 60 миллион евро таклиф қилишга тайёр. Шунингдек, “шпорлар” “Манчестер Сити” ҳужумчиси Омар Мармуш билан ҳам деярли келишувга эришган.
Балогуннинг “Монако” билан амалдаги шартномаси 2028-йил июнигача мўлжалланган. Шунга қарамай, монаколиклар трансфер ойнаси ёпилгунига қадар футболчини сотишга тайёр.
“Астон Вилла” Балогунни Олли Уоткинс “Ал-Ҳилол”га ўтган тақдирда унинг ўрнига олиб келишни режалаштирмоқда. “Барселона” ҳам америкалик ҳужумчининг трансферига қизиқиш билдирган.
Айни пайтда Балогуннинг “Монако” машғулотларига қайтиши кутилмоқда. У Конференсиялар Лигаси саралаш босқичи доирасида Полшанинг “Гурник” клубига қарши жавоб учрашувида майдонга тушиши мумкин. Бироқ трансфер ойнаси ёпилгунига қадар ҳужумчининг жамоасини ўзгартириш эҳтимоли ҳам сақланиб қолмоқда.