Банкларнинг молиявий аҳволини тиклаш тартиби белгиланди
Банклар молиявий қийинчиликка дуч келган тақдирда, уларнинг барқарорлигини тиклаш бўйича режалар қандай шакллантирилиши белгиланди
Банкларнинг молиявий ҳолатини соғломлаштириш тартиби тасдиқланди.
Адлия вазирлиги банкларнинг молиявий аҳволини тиклаш режасига оид талабларни белгиловчи идоравий ҳужжатни давлат рўйхатидан ўтказди. Ушбу ҳужжат 2026-йил 13-августда 3924-рақам билан рўйхатга олинган.
Низом банкларнинг молиявий тикланиш режасининг мазмуни ва уни янгилашга қўйиладиган талабларни белгилайди. Шунингдек, режани Марказий банкка тақдим этиш ва унинг баҳолаш тартиби ҳам ушбу ҳужжатда кўзда тутилган.
Тикланиш режаси банкнинг кузатув кенгаши томонидан тасдиқланади. Банкнинг ички аудит хизмати эса режанинг ишлаб чиқилиши, янгиланиши ва амалга оширилишини йилига камида бир марта мустақил равишда баҳолаб боради.
Тикланиш режаси таркибига уни бошқаришга оид маълумотлар, стратегик таҳлил ва тикланиш кўрсаткичлари киритилади. Бундан ташқари, ҳужжатда тикланиш чора-тадбирлари, тикланиш ссенарийлари, режа доирасида коммуникация қилиш тартиби ҳамда уни амалга оширишга қаратилган тайёргарлик чоралари белгиланган.
Банк тикланиш режасини ҳар йили янгилаб боради. Шу билан бирга, банкнинг ташкилий тузилмаси, фаолияти ёки молиявий аҳволида режага таъсир қилиши мумкин бўлган сезиларли ўзгаришлар юз берса, режа муддатидан олдин ҳам янгиланади.
Низомга кўра, банкларнинг тикланиш режалари мунтазам равишда кўриб чиқилиб, зарур ҳолларда янгиланиб борилади. Мазкур ҳужжат расмий эълон қилинган кундан эътиборан уч ойдан кейин кучга киради.