Банклар энди кредитнинг хавфлари ҳақида мижозни олдиндан огоҳлантиради
Янги тартибга кўра, банклар кредит рекламаси ва шартномасида қарзни ўз вақтида тўламаслик оқибатлари ҳақида мижозни
Банклар энди мижозни кредит хавфлари ҳақида олдиндан огоҳлантиради
Марказий банк бошқарувининг айрим идоралараро норматив-ҳуқуқий ҳужжатларга қўшимчалар киритиш ҳақидаги қарори Адлия вазирлигида 2026-йил 30-сентябрда 3948-сон билан давлат рўйхатидан ўтказилди.
Қарор расмий эълон қилинган кундан эътиборан бир ой ўтгач кучга киради. Унга кўра, банклар кредит рекламаларида қарзни ўз вақтида тўламаслик хавфли экани ҳақида огоҳлантириш бериши шарт.
Расм, видео ёки аудио шаклидаги рекламаларда бундай огоҳлантириш реклама майдони ёки вақтининг камида 10 фоизини эгаллаши керак.
Кредит шартномасининг биринчи саҳифасида ҳам қарзни ўз вақтида тўламаслик оқибатлари ҳақида огоҳлантириш жойлаштирилади. У саҳифанинг камида 30 фоизини эгаллаши керак.
Огоҳлантиришда қарз ўз вақтида тўланмаган тақдирда юзага келиши мумкин бўлган оқибатлар кўрсатилади. Жумладан, қарз миқдори ортиши, мол-мулк ва банк ҳисобварақларидаги маблағларга ундирув қаратилиши ҳамда кредит тарихи бузилиши мумкинлиги ҳақида ахборот берилади.
Кредит маҳсулоти ҳақида мижозни чалғитувчи реклама тарқатган банкларга нисбатан чоралар ва санксиялар қўлланилиши белгиланган.
Янги тартиб истеъмолчиларга кредит олишдан олдин унинг хатарлари ва қарзни ўз вақтида тўламаслик оқибатлари ҳақида аниқ ҳамда тушунарли маълумот олиш имконини беради.
Қарор расмий эълон қилинган кундан бир ой ўтгач кучга киради. Шундан сўнг кредит рекламаси ва шартномаларида белгиланган огоҳлантириш талабларига риоя этилиши керак бўлади.