Бали полицияси австралиялик эркак ва болалар уйида ўлик ҳолда топилганидан кейин тергов бошлади
Эркакнинг рафиқаси хавотирга тушиб, қўшниларидан оиласидан хабар олишни илтимос қилганидан сўнг, воқеа жойига полиция чақирилган.
Бали полицияси машҳур сайёҳлик ҳудудидаги бунгалода австралиялик эркак ва унинг икки фарзанди ўлик ҳолда топилганидан кейин тергов ҳаракатларини олиб бормоқда.
56 ёшли Дэмиен Жон Шоу ва унинг фарзандлари — олти ёшли ўғли ва тўрт ёшли қизи якшанба куни Кутадаги уйида ўлик ҳолда топилган.
Полициянинг маълум қилишича, эркакнинг рафиқаси эри билан телефон орқали гаплашгандан сўнг хавотирга тушиб, қўнғироқ қилганидан кейин қўшнилар оиладан хабар олишган. Аёл ўша пайтда Балида бўлмаган.
Австралия ОАВлари полиция ушбу ҳолатни қотиллик ва ўз жонига қасд қилиш сифатида кўриб чиқаётгани ҳақида хабар берди. Бироқ полиция BBC'га ўлим сабаби ёки тарзи ҳали аниқланмаганини ва қўшимча экспертизалар ўтказилишини маълум қилди.
Полициянинг билдиришича, эркакнинг рафиқаси эри билан гаплашаётганда фарзандларидан бирининг йиғлаётганини эшитгач, қўшнисига телефон қилган. Шундан сўнг у эри билан қайта боғлана олмаган.
Хабар қилинишича, унинг рафиқаси бир неча кун олдин пойтахт Жакартага жўнаб кетган бўлган.
Полициянинг маълум қилишича, қўшни маҳаллий аҳоли вакиллари билан биргаликда, эшик тақиллатилганда жавоб бўлмаганидан кейин уйга куч билан кирган. Ичкарида уч нафар қурбон топилган.
Полиция Шоу асли Ғарбий Австралиянинг Фримантл шаҳридан бўлганини билдирди. Штат бош вазири Рожер Кук бу хабарни "жуда оғир вазият" деб атади.
"Бу жуда қайғули вазият; қалбимиз барча дахлдор инсонлар билан бирга. Умид қиламизки, тез орада нима содир бўлганининг таг-тубига етамиз", — дея қўшимча қилди у.