БАА прокуратураси: Флйдубаи пилоти самолётни аеропорт терминалига уришни режалаштирган
Дубайдан Тел-Авивга учган Флйдубаи самолётининг иккинчи учувчиси лайнерни Бен-Гурион аеропортининг йўловчилар терминалига уришни режалаштирган. Бу ҳақда БАА бош прокурори Ҳамад Саиф Ал-Шамси тергов маълумотларига таяниб билдирди.
БАА прокуратураси: Флйдубаи пилоти самолётни аеропорт терминалига уришни режалаштирган
ДВ хабарига кўра, бош прокурор 9-октабр куни гумонланувчи — 29 ёшли Уммон фуқароси терактни амалга оширишни кўзлаганини айтган.
АФП маълумотига кўра, қўлга олинган учувчи терговчиларга ҳужумни ёлғиз тайёрлаганини ва имкон қадар кўпроқ одамни ўлдиришни мақсад қилганини билдирган.
Ал-Шамсининг таъкидлашича, гумонланувчи Флйдубаиъга ишга киришдан олдин барча зарур хавфсизлик текширувларидан ўтган. У учувчилик лицензияси ва судланмаганлик ҳақидаги маълумотномани тақдим этган. Бироқ текширувлар унинг экстремистик қарашлари ёки теракт содир этиш ниятини аниқламаган.
Ҳодиса 30-сентабр куни Дубай - Тел-Авив рейсида юз берган. Самолётни эгаллаб олишга уриниш ҳақидаги сигналдан сўнг Боеинг 737 МАХ 8 Саудия Арабистонининг Табук шаҳри аеропортига фавқулодда қўнган.
Лайнер бортида 174 киши, жумладан, 27 нафар бола бўлган. Йўловчиларнинг аксарияти Исроил фуқаролари экани айтилган.
Учувчилар кабинасидаги олишув пайтида самолёт 29 сония ичида 9410 метрдан 5105 метргача — 4305 метр баландликни йўқотган.
Айрим йўловчиларнинг айтишича, дастлаб кабинадан бақириқлар эшитилган. Кейин эшик очилиб, учувчилардан бири жароҳатлангани маълум бўлган. Экипаж аъзолари ва йўловчилар ҳужум қилган шахсни зарарсизлантиришга муваффақ бўлган.
Самолёт командири, Ҳиндистон фуқароси Смит Маччхар ҳужумда оғир жароҳатланган ва Саудия Арабистонида шифохонага ётқизилган.
У Ҳиндистон бош вазири Нарендра Моди билан видеомулоқотда самолёт тез баландлик йўқотаётганини англагач, кабина эшигини очиш учун бор кучини тўплаганини айтган.
«Мен жароҳатланган ҳолда полда ётардим. Лекин ўзимга сўнгги бор ҳаракат қилиб, эшикни ичкаридан очишим кераклигини айтдим. Эмаклашга уриндим. Эшик жуда яқин эди. Уни очишга муваффақ бўлдим ва бошқалар ичкарига кирди», - дея унинг сўзларини келтирган Тҳе Телеграпҳ.
Моди учувчининг ҳаракатларини кўплаб одамларнинг ҳаётини сақлаб қолган жасорат, сабр-тоқат ва тез қарор қабул қилиш намунаси деб баҳолаган.
Жароҳатланган командирга йўловчилардан бири — стоматолог Шота Мусаев ёрдам кўрсатган.