Австралияда бошидан оёқлар ўсиб чиққан бузоқ туғилди
Австралиянинг Квинсленд штатида бошидан иккита қўшимча оёқ ўсиб чиққан урғочи бузоқ туғилди. Эгалари уни ўлдиришни ўйлаган, аммо ветеринар операция қилишни таклиф этган. Қарийб 90 дақиқалик амалиётдан сўнг бузоқ тезда тикланиб, онаси ёнига қайтарилган.
Австралияда бошидан оёқлар ўсиб чиққан бузоқ дунёга келди
Накед Ссиенсе нашри АБС хабарига таяниб ёзишича, Спайдер лақабли бузоқни кўрган ветеринар Меган Смит 20 йиллик фаолияти давомида бунақа ҳолатга дуч келмаганини айтган.
Мутахассисларнинг таъкидлашича, қўшимча оёқлар олиб ташланмаганида, бузоқ улғайгани сайин турли муаммолар юзага келиши, жумладан, унинг мувозанатни сақлаши қийинлашиши мумкин эди.
Сидней университети Ветеринария фанлари мактаби мутахассиси Имке Таммен ҳозирча бу ҳолатнинг аниқ сабабини айтишнинг имкони йўқлигини билдирган.
Эҳтимолий тушунтиришлардан бири — «паразит эгизак» ҳодисаси. Бунда эмбрионал ривожланишнинг дастлабки босқичларида бир ҳомила камроқ ривожланган эгизагини ўзига сингдиради. Натижада иккинчи эгизак танасининг айрим қисмлари ривожланаётган ҳомилага бириккан ҳолда қолиши мумкин.
Шу билан бирга, Таммен бошқа сабабларни ҳам инкор этмаган. Унинг айтишича, ҳайвоннинг ривожланиш жараёнидаги айрим бузилишлар ҳам қўшимча оёқлар пайдо бўлишига олиб келиши мумкин.
Қорамолларнинг айрим турларида бундай ҳолат ирсий генетик касалликлар билан боғлиқ бўлади. Олимларга қўшимча оёқлар ривожланишига алоқадор айрим генетик мутациялар маълум, бироқ бу Спайдердаги ҳолатнинг сабаби экани тасдиқланмаган.
Қўшимча оёқлар билан туғиладиган ҳайвонлар қанчалик тез-тез учраши ҳақида ҳам аниқ маълумот йўқ.
Спайдернинг бошидаги ортиқча оёқларни олиб ташлаш операцияси тахминан бир ярим соат давом этган. Амалиётдан сўнг бузоқнинг аҳволи тезда яхшиланган.