Австралия Steam каби ўйин платформаларида болалар хавфсизлиги борасида «жиддий» камчиликлар борлигини маълум қилди
Fortnite, Roblox ва Minecraft ўйинларига ҳам онлайн хавфсизлик регулятори томонидан «ўз фаолиятини яхшилаш» талаби қўйилди.
Австралия Steam каби ўйин платформаларида болалар хавфсизлиги борасида «жиддий» камчиликлар борлигини маълум қилди
Электрон хавфсизлик бўйича комиссар Жули Инман Грантнинг айтишича, ўйин платформалари болалар хавфсизлиги масаласида «ўз ўйинларини яхшилаши» керак
Австралиянинг онлайн хавфсизликни тартибга солувчи органи оммабоп ўйин платформаларининг болаларни интернетда ҳимоя қилиш усулларида «жиддий камчиликлар»ни аниқлади.
Янги ҳисоботда Steam, Roblox, Fortnite ва Minecraft платформаларининг болалар хавфсизлиги чораларини қўллашдаги ноизчил ёндашувлари аниқланди. Тадқиқотлар шуни кўрсатадики, Австралияда 8 ёшдан 17 ёшгача бўлган ҳар 10 боладан тўққизтаси онлайн ўйинлар ўйнаган.
«Австралиялик болалар йиртқичлар, жинсий товламачилар, зўравонлик руҳидаги экстремистик контент ёки бошқа зарарли материалларга дуч келмасдан онлайн ўйнаш ҳуқуқига эга», деди Электрон хавфсизлик бўйича комиссар Жули Инман Грант.
Унинг сўзларига кўра, платформалардаги заиф хавфсизлик «йиртқич катталар»га болалар билан боғланиш ва кейинчалик уларни жинсий эксплуатация қилиш ёки радикаллаштириш учун йўл очиб беради.
Ҳисоботда аниқланишича, Steam ва Steam Chat эгаси бўлган АҚШнинг Valve ўйин гиганти маълум бўлган зарарли контентни аниқлаш ва олиб ташлаш учун соҳада кенг қўлланиладиган технология туридан фойдаланмайдиган ягона провайдер бўлган.
Шунингдек, Valve чатларда болаларнинг жинсий эксплуатацияси ёки зўравонлик материалларини аниқлаш учун воситалардан «фаол» фойдаланмаган, мавжуд тизимлар эса асосан фирибгарликларни белгилаб боради, дейилади ҳисоботда.
Roblox ва Valve тил аниқлаш тизимларини ўргатиш учун фақат ички маълумотлар тўпламидан фойдалангани ва ушбу моделларни мунтазам равишда қайта ўқитмагани учун ҳисоботда қайд этилган.
«Биз ушбу хизматлардан болаларнинг жинсий эксплуатацияси, жинсий товламачилик ҳамда зўравонликни тарғиб қилувчи, қўзғатувчи ёки ўргатувчи материаллар ва фаолият каби жиддий зарарларни аниқлаш ва уларга қарши курашиш учун ўз ўйинларини яхшилашини кутамиз», деди Инман-Грант.
Болалар учун аккаунтларни таклиф қиладиган Minecraft ва Fortnite одатда фойдаланувчиларга ўз ёшини ўзлари кўрсатишига имкон беради, деб таъкидланади ҳисоботда. Бу эса ўзини катталар деб айтган ҳар қандай киши «юқори хавфли мулоқот функциялари»дан фойдаланиши мумкинлигини англатади.
Steam ҳам фойдаланувчиларнинг ўз ёшини ўзлари кўрсатишига таянган, бироқ ҳисоботда платформа яқинда кредит карталари ёрдамида ёшни текширишни жорий қилгани ва Roblox ўтган йилнинг декабрь ойидан бошлаб қатъийроқ ёш текширувларини йўлга қўйгани эътироф этилган.
Ҳисоботда кўтарилган яна бир муаммо тўртта ўйин платформасининг маълумот алмашиши ва соҳа ташаббусларида иштирок этишидаги ноизчиллик бўлди.
Minecraft дастурчиси Mojang Studios ва Roblox болаларнинг жинсий эксплуатациясига, шунингдек, интернетдаги зўравонлик экстремизмига қарши курашиш бўйича соҳавий тажрибалари билан ўртоқлашган, аммо Valve бундай қилмаган.
Бошқа томондан, Fortnite ишлаб чиқарувчиси Epic Games интернетда болаларнинг жинсий эксплуатацияси ва суиистеъмолига қарши курашишга қаратилган глобал дастур доирасида қоидабузарлик ҳолатларини бошқа платформалар билан баҳам кўрмаган.
Ҳисобот Австралиянинг Электрон хавфсизлик комиссияси томонидан 2025 йил октябрь ва 2026 йил март ойлари оралиғида платформалар фойдаланувчиларни жиддий онлайн зарарлардан қандай ҳимоя қилаётгани ҳақида тўпланган маълумотларга асосланган.
Австралия сўнгги йилларда онлайн хавфсизлик борасидаги позицияси билан дунё миқёсида сарлавҳаларга чиқди. Ўтган йилнинг декабрь ойида мамлакатда 16 ёшга тўлмаганлар учун ижтимоий тармоқлардан фойдаланишни тақиқловчи (бунга ўйин платформалари кирмаган) дунёдаги етакчи қонун жорий этилди ва яқинда технология гигантларини фойдаланувчиларга ижтимоий тармоқ алгоритмларидан воз кечиш имкониятини таклиф қилишга мажбурлаш бўйича ҳаракатлар бошланди.