Аудит регулятори Manchester City бухгалтериясини текширмоқда
Расмий тергов бошланмаган, аммо регулятор ҳолат юзасидан суриштирув ўтказмоқда.
Аудит назорати органи "Манчестер Сити" ҳисоботларини текширмоқда
Буюк Британиянинг аудитни тартибга солиш органи "Манчестер Сити"даги бухгалтерия қоидабузарликлари бўйича суриштирувларга бош-қош бўлаётганини тасдиқлади.
Жамоалар палатасининг бизнес бўйича танлов қўмитасига юборилган хатда Молиявий ҳисобот кенгаши (FRC) 30 сентябрда Англия ва Уэльсдаги Сертификатланган бухгалтерлар институтидан ушбу масаланинг "назорат кўриб чиқилишини" ўз зиммасига олганини маълум қилди.
Расмий тергов бошлангани йўқ, аммо FRC ушбу ҳолат бўйича суриштирув олиб бормоқда.
Бу қарор "Манчестер Сити" мустақил комиссия томонидан 2009-10 ва 2017-18 йилги мавсумлар оралиғида Премьер-лиганинг молиявий қоидаларини бузиш, жумладан, клубнинг молиявий аҳволини сунъий равишда 900 миллион фунт стерлингдан ортиқроққа ошириб кўрсатиш билан боғлиқ барча айбловлар бўйича айбдор деб топилганидан кейин қабул қилинди. "Сити" ушбу қарор устидан шикоят қилмоқда.
FRC қоидабузарлик далилларини аниқлаган тақдирда, санкциялар қўллаш учун кўпроқ ресурсларга ва кенгроқ ваколатларга эга. У одатда рўйхатга олинган оммавий компаниялар каби йирик ташкилотлардаги бухгалтерия стандартларини назорат қилади, лекин футбол клубларини эмас.
ФРС "Манчестер Сити" аудиторлари бўлмиш BDO компаниясининг хатти-ҳаракатларини текшириб, аудит қоидаларга мувофиқ амалга оширилганини аниқлаши мумкин.
Шунингдек, агар "Этиҳад" клубининг директорлари ёки ходимлари каби шахслар профессионал бухгалтерия ташкилотларига аъзо бўлса, уларга нисбатан ҳам санкциялар қўллаши мумкин.
BDO Буюк Британиядаги бешинчи энг йирик бухгалтерия фирмаси ҳисобланади, аммо ўзини футбол соҳасида бозор пешқадами деб атайди ва бошқа ҳар қандай фирмага қараганда кўпроқ Премьер-лига ва Чемпионшип клубларига маслаҳат беради.
"Манчестер Сити" ишини кўриб чиққан мустақил комиссия клуб акциядорлари томонидан киритилган маблағларнинг келиб чиқишини яшириш учун фойдаланилган схема бўйича ўз аудиторларида "жанглиш таассурот" уйғотганини ва аудиторлар ушбу схемадан "хабардор бўлмаганини" аниқлади.
"Манчестер Сити" вакиллари комиссия қарори устидан шикоят қилишларини айтиб, унда "қонун, принцип ва фактлар бўйича жиддий хатоликлар мавжудлигини ҳамда у ишончсиз эканини" таъкидладилар.
Бизнес бўйича танлов қўмитаси раиси Лиам Бёрн FRC'га шунга ўхшаш ҳолатларни текшириш учун кенгроқ ваколатлар беришга чақирди.
У X ижтимоий тармоғида шундай деб ёзди: "Тартибга солувчи органнинг хати унинг клубдан далилларни талаб қилиб олиш ва унинг интизомий қоидалари доирасига кирмайдиган директорларни жавобгарликка тортиш имкониятларида бўшлиқлар борлигини кўрсатади.
Bu компаниялар ва директорларни жавобгарликка тортиш учун мавжуд бўлган ваколатлар бўйича жиддий саволларни келтириб чиқаради.
Ҳукумат ушбу бўшлиқларни ёпишга қаратилган ислоҳотлар нега бекор қилинганини ва энди жавобгарликни кучайтириш учун нима қилинишини тушунтириб бериши шарт".