“Атлетико” Хулиан Алвареснинг “Барселона”га ўтишига рухсат берди — Эл Чирингуито

“Атлетико” Хулиан Алвареснинг “Барселона”га ўтишига розилик берди — Эл Чирингуито

Мадриднинг “Атлетико” клуби раҳбарияти Аргентина терма жамоаси ҳужумчиси Хулиан Алвареснинг “Барселона”га трансферига рухсат берди. Эл Чирингуито нашрининг маълумотига кўра, клуб аргентиналик футболчига трансфер бўйича ёзма рухсатнома тақдим этган.

Аввалроқ Алварес мадридликлар билан 2030-йилгача тузилган шартномаси борлигига қарамай, жамоани тарк этиш ниятида эканлигини оммавий тарзда эълон қилган эди. Испания ОАВлари “Барселона” ҳужумчи учун 130 миллион евро таклиф қилишга тайёрлиги ҳақида хабар берганди. Шундан сўнг “Атлетико” вакиллари Алвареснинг Каталония клубига ўтиш эҳтимоли нолга тенг эканлигини маълум қилганди.

Ўтган ҳафтада ҳужумчи иккита машғулотни ўтказиб юборди ва “Атлетико”нинг Ла Лига доирасида “Севиля”га қарши шанба кунги ўйини (3:1) қайдномасига киритилмади. Якшанба куни эса у яна умумий гуруҳ машғулотларига қайтган.

Маълумот учун, 26 ёшли Алварес ўтган мавсумда “матрасчилар” сафида жами 49 та ўйинда майдонга тушиб, 20 та гол уришга муваффақ бўлган. Шунингдек, у Аргентина терма жамоаси сафида 58 та учрашув ўтказиб, 15 та голга муаллифлик қилган.

Ҳужумчи миллий жамоа билан 2022-йилги Жаҳон чемпионати ҳамда икки марта Америка Кубоги (2021, 2024) ғолиблигини қўлга киритган. У 2026-йилги Жаҳон чемпионатида ҳам Аргентина билан финалгача етиб бориб, ҳал қилувчи баҳснинг қўшимча бўлимларида испанларга 0:1 ҳисобида имкониятни бой берди.