Astana Finance Days 2026 90 та давлатдан 8 минг иштирокчини бирлаштирди
9–10 сентябрь кунлари «Астана» халқаро молия марказида IX Astana Finance Days 2026: Delivering Impact. Capital in Action молиявий форуми бўлиб ўтмоқда.
Astana Finance Days 2026 90 та мамлакатдан 8 минг иштирокчини бирлаштирди
9–10 сентябрь кунлари «Астана» халқаро молия марказида IX Astana Finance Days 2026: Delivering Impact. Capital in Action молиявий форуми бўлиб ўтмоқда.
Форум 90 та мамлакатдан 8 мингга яқин иштирокчини, жумладан, инвесторлар, молия ва технология соҳалари вакиллари, регуляторлар, давлат ва квазидавлат институтлари ҳамда халқаро бизнес вакилларини бирлаштирди.
Ишчи дастурнинг диққат марказида — капитал бозорлари ва инвестиция маҳсулотларини ривожлантириш, тартибга солиш ва ҳуқуқий муҳитни такомиллаштириш, институционал миқёсдаги инновацияларни жорий этиш, иқтисодиётнинг реал секторини молиялаштириш, шунингдек, минтақавий ва трансчегаравий ҳамкорлик масалалари ўрин олди.
«Бугунги кунда капитал учун рақобат нафақат жозибадор шароитларни, балки имкониятларни реал лойиҳалар ва инвестицияларга айлантириш қобилиятини ҳам талаб қилади. Astana Finance Days 2026 — Delivering Impact. Capital in Action форумининг моҳияти ҳам айнан шунда. Биз ғоялар амалий ечимлар, инвестиция лойиҳалари ва узоқ муддатли шерикликларга айланиши учун инвесторлар, регуляторлар ва бизнесни бирлаштирмоқдамиз», — деб таъкидлади «Астана» халқаро молия маркази бошқарувчиси Ренат Бектуров.
Молия тизими технологик трансформация шароитида
Биринчи кун дастури суверен ва институционал капиталнинг иқтисодий ўсишдаги роли, молиявий инфратузилманинг келажаги, реал активларни токенизация қилиш, инвесторлар ҳуқуқларини ҳимоя қилиш, барқарор молиялаштириш ва реал сектор лойиҳаларини ривожлантиришга бағишланган сессияларни ўз ичига олди.
«Молия архитектурасининг трансформацияси» ялпи сессияси асосий воқеага айланди. Унда Қозоғистон Миллий банки раиси Тимур Сулейменов, АХММ бошқарувчиси Ренат Бектуров, Freedom Holding Corp. бош ижрочи директори Тимур Турлов, Network School асосчиси ва The Network State китоби муаллифи Баладжи Сринивасан, шунингдек, Anchorage Digital компаниясининг стейблкоинлар бўйича ечимлар йўналиши глобал раҳбари Серджио Мелло иштирок этди.
Иштирокчилар технологиялар, тартибга солиш ва капитал ҳаракатининг янги моделлари молия бозорлари тузилмасига қандай таъсир кўрсатаётганини муҳокама қилдилар. Рақамли активлар, рақамли тенге, крипторезервлар, сунъий интеллектни тартибга солиш ва децентрализациялашган молияни ривожлантириш масалаларига алоҳида эътибор қаратилди.
Капитал бозорлари истиқболлари бўйича алоҳида нуқтаи назарни BlackRock Investment Institute компаниясининг Яқин Шарқ ва Осиё-Тинч океани минтақаси бўйича бошқарувчи директори ва бош инвестиция стратеги Бен Пауэлл тақдим этди.
«Суверен ва институционал капитал ўсиш ва стратегик трансформация катализаторлари сифатида» сессиясида иштирокчилар давлат ва институционал инвесторларнинг узоқ муддатли иқтисодий ривожланишни таъминлаш, таркибий ўзгаришлар ва кенг кўламли лойиҳаларни амалга оширишдаги ролини кўриб чиқдилар.
Токенизация ва рақамли инфратузилма
Форумнинг технологик блоки «Молиявий инфратузилманинг келажаги» ва «Чегарасиз капитал: токенизация ва янги молиявий инфратузилма» сессиялари билан давом этди.
Қозоғистон тараққиёт банки, Қозоғистон миллий тўлов корпорацияси, Mastercard, Janus Henderson Investors, Bir Ecosystem, Phillip Securities, Solana, The Open Platform ва Commodity Chain вакиллари тўлов инфратузилмаси, рақамли активлар ва капитал ҳаракатининг янги механизмларини ривожлантиришни муҳокама қилдилар.
Дастур мавзуларидан бири геология-қидирув компаниялари ва тоғ-кон лойиҳаларини бошланғич босқичларда молиялаштириш бўлди. «Юниор тоғ-кон лойиҳаларини молиялаштириш: муаммолар ва имкониятлар» сессияси доирасида соҳавий компаниялар ва молиявий ташкилотлар вакиллари сўзга чиқдилар.
2026 йил апрель ойида АХММ бошланғич босқичдаги геология-қидирув лойиҳаларига инвестицияларни жалб қилиш учун Junior Mining Platform платформасини ишга туширган эди. Келиб тушган 48 та аризадан 23 та лойиҳа саралаб олинди ва форумнинг питч-сессияси доирасида потенциал инвесторларга тақдим этилди.
Яшил молиялаштириш ва минтақавий ҳамкорлик
Astana Finance Days 2026 доирасида Туркий яшил молия кенгашининг иккинчи йиллик йиғилиши ҳам бўлиб ўтди. У Туркий минтақа мамлакатлари молиявий регуляторлари, давлат органлари ва тараққиёт институтлари вакилларини бирлаштирди.
Иштирокчилар орасида Туркий давлатлар ташкилоти бош котиби Кубанычбек Омуралиев, Туркий инвестиция жамғармаси президенти Багдад Амреев, шунингдек, Озарбайжон Марказий банки, Қирғизистон фонд биржаси, Венгрия миллий банки, АХММ Яшил молия маркази ва бошқа ташкилотлар вакиллари бор эди.
Молиявий хавфсизлик масалаларига «Рақамли даврда молиявий разведка: рақамли активлардан сунъий интеллектгача» сессияси бағишланди. Халқаро ва молиявий ташкилотлар вакиллари рақамли технологияларнинг молиявий хавф-хатарларни аниқлашга таъсирини ва давлатнинг хусусий сектор билан ҳамкорлигини кўриб чиқдилар.
Алоҳида йўналиш АХММнинг ҳуқуқий инфратузилмасига бағишланди. «Капитал ҳаракатда: АХММ Суди ва Халқаро ҳакамлик маркази (ХҲМ) инвесторлар ҳуқуқларини қандай ҳимоя қилади» сессиясида низоларни халқаро миқёсда ҳал этиш механизмлари, шаффофликни ошириш ва инвесторлар ишончини мустаҳкамлашга қаратилган рақамли воситалар ва институционал ёндашувлар муҳокама қилинди.
Ўзбекистон — минтақавий молиявий мулоқот иштирокчиси
Форумнинг минтақавий йўналиши AFSAнинг «Тарқоқликдан интеграцияга: молия бозорларини мустаҳкамлаш учун минтақавий ҳамкорлик» давра суҳбати билан давом этди.
Муҳокамада Қозоғистон, Ўзбекистон, Қирғизистон, Тожикистон ва Грузия молиявий регуляторлари, халқаро молия ташкилотлари ва тараққиёт институтлари, жумладан, Осиё тараққиёт банки (ОТБ), Европа тикланиш ва тараққиёт банки (ЕТТБ), Жаҳон банки ва Халқаро молия корпорацияси вакиллари иштирок этди.
Иштирокчилар капиталнинг трансчегаравий ҳаракати йўлидаги асосий тўсиқларни, ўзаро тан олиш, молия бозорларига чиқишни кенгайтириш, маълумот алмашиш ва назорат соҳасида ҳамкорликни мустаҳкамлаш масалаларини кўриб чиқдилар.
Шу тариқа, Ўзбекистоннинг Astana Finance Days 2026 минтақавий йўналишидаги иштироки Марказий Осиёда молиявий интеграцияни ривожлантириш ва трансчегаравий инвестициявий ҳамкорликни кенгайтириш бўйича кенгроқ мулоқотнинг бир қисмига айланди.
АХММ интеллектуал рақамли ёрдамчини тақдим этди
АХММ форум доирасида илк бор мижозларга маслаҳат бериш ва «Астана» халқаро молия маркази хизматлари бўйича йўл кўрсатиш учун кўп тилли интеллектуал ёрдамчи — AIDA (AIFC Intelligent Digital Assistant) тизимини тақдим этди.
Тизим матнли ва овозли сўровларни қайта ишлайди, АХММда рўйхатдан ўтиш, амалдаги талаблар, тартиб-таомиллар ва мавжуд хизматлар ҳақида маълумот беради, зарурат туғилганда эса фойдаланувчини тегишли бўлинма ёки мутахассисга йўналтиради.
Форум иштирокчилари AIDA ишини реал вақт режимида турли тилларда синаб кўриш имкониятига эга бўлдилар.
Янги битимлар ва инвестиция лойиҳалари
Форум доирасида халқаро тартибга солиш ва инвестициявий ҳамкорликни ривожлантиришга қаратилган бир қатор ҳужжатларни имзолаш кўзда тутилган.
Улар орасида Грузия Миллий банки ва АХММнинг Молиявий хизматларни тартибга солиш қўмитаси (AFSA), шунингдек, AFSA ва Хорватия молиявий назорат агентлиги (HANFA) ўртасидаги ўзаро англашув меморандумлари бор.
Бундан ташқари, АХММ юрисдикциясида ғаллани токенизация қилиш лойиҳаси доирасида Tech Hub Limited ва Concordia Group Ltd., шунингдек, Tech Hub Limited ва Aitas Agro Ltd. ўртасида битимлар имзоланиши режалаштирилган.
Молия институтлари, банклар, инвестиция ва бошқарув компаниялари, финтех ва технологик лойиҳаларни бирлаштирган AFD Exhibition Hub кўргазма майдончаси форумнинг муҳим қисмига айланди. Иштирокчилар ўз маҳсулотлари ва ечимларини тақдим этдилар, шунингдек, потенциал инвесторлар ва шериклар билан тўғридан-тўғри алоқалар ўрнатиш имкониятига эга бўлдилар.
Astana Finance Days 2026 тадбирининг ўтказилиши жаҳон молия тизимининг асосий тенденциялари, жумладан, рақамлаштириш, активларни токенизация қилиш, сунъий интеллектни ривожлантириш, яшил молиялаштириш ва капиталнинг трансчегаравий ҳаракатини муҳокама қилиш учун майдонга айланди.
Форум, шунингдек, минтақавий молиявий ҳамкорликни мустаҳкамлашга ва Марказий Осиё мамлакатлари билан халқаро бозорлар ўртасидаги инвестициявий ҳамкорликни кенгайтиришга хизмат қилди.