Асалари танасидан узилган ниш ҳам заҳар юборишда давом этиши тасвирга олинди
Австралиянинг Маккуори университети тадқиқотчилари асалари танасидан ажралган ниш қандай қилиб заҳар юборишда давом этишини тасвирга олди. Кузатувларда ниш танадан тўлиқ узилганидан кейин ҳам бир-икки дақиқа давомида ишлаган.
Асалари танасидан ажралиб чиққан ниш ҳам заҳар юборишда давом этиши видеога туширилди
Олимлар ички ишлаш механизмини кузатиш учун асалариларни инсон терисини тақлид қилувчи шаффоф гелга ниш санчишга ундаган. Юқори кадр частотасидаги микротасвирга олиш ёрдамида ниш ичидаги майда қисмларнинг ҳаракати кузатилган.
Видео ва уч ўлчамли сканерлаш ниш ичида иккита митти, эгилувчан клапан навбатма-навбат ҳаракат қилишини кўрсатган. Бир клапан пастга силжиганда парашют каби очилиб, заҳарни олдинга суради. Юқорига қайтганда эса соябон каби йиғилиб, иккинчи клапан ёнидан ўтади ва янги заҳар порсияси учун йўл очади.
Шу тариқа механизм икки поршенли насос сингари ишлайди. Клапанларнинг уйғун ҳаракати заҳарнинг бир маромда юборилишини таъминлайди.
Асалари ниши терида қолиб кетганда, унга уланган заҳар қопчаси ва ҳаракатлантирувчи тузилмалар ҳам танадан ажралиб чиқиши мумкин. Бу асаларига ҳалокатли шикаст етказса-да, ниш механизми қисқа муддат мустақил ишлашда давом этади.
Механизмни текшириш учун тадқиқотчилар 3Д-принтерда унинг катталаштирилган, ишлайдиган нусхасини ҳам тайёрлаган. Бунда қаттиқ ва эгилувчан полимер материаллардан фойдаланилган.
Муаллифлар ушбу тузилма келажакда ихчам тиббий микронасослар ва дорини тўқималарга аниқ етказиб берувчи қурилмаларни ишлаб чиқишга ёрдам бериши мумкинлигини таъкидламоқда.