“Арсенал” “Манчестер Сити”ни йирик ҳисобда таслим этиб, Англия Суперкубоги соҳибига айланди
“Арсенал” “Манчестер Сити”ни йирик ҳисобда мағлуб этиб, Англия Суперкубогини қўлга киритди
Уелснинг Кардифф шаҳридаги “Принсипалити” стадионида 2026-йилги Англия Суперкубоги баҳси бўлиб ўтди. Унда Лондоннинг “Арсенал” клуби “Манчестер Сити”га қарши майдонга тушиб, 3:0 ҳисобида ишончли ғалабани тантана қилди.
Учрашув тўлиқ “тўпчилар”нинг устунлиги остида ўтди. Ўйиннинг биринчи дақиқасидаёқ Риккардо Калафёри ҳисобни очиб, лондонликларни олдинга олиб чиққан бўлса, 28-дақиқада Кай Хаверц жамоасининг устунлигини иккитага оширди. Иккинчи бўлимнинг бошида, аниқроғи 48-дақиқада Мартин Эдегор учинчи тўпни киритиб, ўйинга якуний нуқтани қўйди. Қолган дақиқаларда ҳисоб ўзгармади ва Микел Артета шогирдлари янги мавсумдаги илк совринини қўлга киритди.
Ўзбекистонлик ҳимоячи Абдуқодир Ҳусанов учрашувни асосий таркибда бошлаб, тўлиқ 90 дақиқа майдонда ҳаракат қилди.
Маълумот ўрнида, Англия Суперкубоги — анъанага кўра олдинги мавсумдаги Премьер Лига чемпиони ва Англия Кубоги соҳиби ўртасида ўтказиладиган ўйиндир.
“Арсенал” 2025/2026-йилги мавсумда 38 та ўйинда 85 очко жамғариб, АПЛ чемпионига айланган эди. Шунингдек, жамоа ўтган мавсум Чемпионлар Лигасининг финалига қадар етиб бориб, ҳал қилувчи баҳсда “ПСЖ”га пеналтилар сериясида имкониятни бой берган (1:1, пеналтилар бўйича 3:4).
“Манчестер Сити” эса ўтган мавсум АПЛда 78 очко билан иккинчи ўринни банд этган, бироқ Англия Кубогида зафар қучгани туфайли Суперкубок учун курашиш ҳуқуқини қўлга киритган эди.