“Арсенал” Алварес учун 80 млн евро ва бир футболчисини таклиф қилди
“Арсенал” Алваресни қўлга киритиш учун 80 миллион евро ва футболчи таклиф қилди
Лондоннинг “Арсенал” клуби Аргентина терма жамоаси ва “Атлетико” ҳужумчиси Хулиан Алваресни ўз сафига жалб қилишга интилишда давом этмоқда. Спорт нашрининг маълумотларига кўра, “канонирлар” бу трансфер учун Мадрид клубига тахминан 80 миллион евро ва ҳужумчи Виктор Дёкерешни таклиф қилмоқда.
Шунингдек, лондонликлар аргентиналик юлдузга йилига 25 миллион евро маош тўлашга тайёр. Бу унинг ҳозирги маошидан қарийб икки баробар кўпдир. Бироқ, келишувнинг тақдири бевосита футболчининг ўзига боғлиқ. Хабарларга кўра, бир неча йил олдин “Манчестер Сити” шарафини ҳимоя қилган ҳужумчининг яна Англия чемпионатига қайтиш истаги йўқ.
Аввалроқ Хулиан Алваресга Каталониянинг “Барселона” клуби ҳам қизиқиш билдираётгани ҳақида хабарлар тарқалган эди. Бироқ “Атлетико” аргентиналик ҳужумчи учун камида 150 миллион евро талаб қилгач, “кўк-анорранглилар” бу трансфердан воз кечишга мажбур бўлди.
Эслатиб ўтамиз, 2024-йилда “Атлетико” 26 ёшли аргентиналикни “Манчестер Сити”дан 75 миллион евро эвазига сотиб олган эди. 2025/2026-йилги мавсумда ҳужумчи мадридликлар сафида жами 49 та ўйинда майдонга тушиб, ўз ҳисобига 20 та гол ва 9 та голли узатма ёздириб қўйган.